Is eating raw eggs beneficial or dangerous? Make sure to find out before you eat them!
पुढारी ऑनलाईन : बॉडीबिल्डिंग किंवा फिटनेसची आवड असलेले अनेक जण सकाळी दुधात कच्चे अंडे मिसळून पितात किंवा ते थेट खातात. त्यांचा असा समज असतो की अंडे शिजवल्याने त्यातील पोषक तत्त्वे कमी होतात. मात्र विज्ञान याबाबत नेमके काय सांगते, हे जाणून घेणे महत्त्वाचे आहे.
कच्चे अंडे पचवणे सोपे असते का?
Healthline च्या माहितीनुसार, अनेकांना वाटते की कच्च्या अंड्यातील प्रथिने शरीराला अधिक प्रमाणात मिळतात. पण प्रत्यक्षात परिस्थिती उलट आहे.
शिजवलेल्या अंड्यातील सुमारे 90 टक्के प्रथिने शरीर सहज शोषून घेते. कच्च्या अंड्यातील केवळ 50 टक्के प्रथिनेच शरीराला पचवता येतात. याशिवाय, कच्च्या अंड्याच्या पांढऱ्या भागात एविडिन (Avidin) नावाचे प्रथिन असते. हे शरीरातील बायोटिन (व्हिटॅमिन B7) चे शोषण कमी करते, ज्यामुळे त्याची कमतरता निर्माण होऊ शकते.
साल्मोनेला संसर्गाचा मोठा धोका
कच्चे अंडे खाण्याचा सर्वात गंभीर धोका म्हणजे त्यातील साल्मोनेला (Salmonella) नावाचा जीवाणू. अमेरिकेतील CDC च्या माहितीनुसार, कच्च्या किंवा अर्धवट शिजलेल्या अंड्यांमध्ये हा जीवाणू असण्याची शक्यता जास्त असते. हा जीवाणू अंडे तयार होण्याच्या प्रक्रियेदरम्यान त्यात प्रवेश करू शकतो.
साल्मोनेला शरीरात गेल्यास पुढील समस्या उद्भवू शकतात :
तीव्र पोटदुखी, जुलाब (डायरिया), उलट्या, ताप, शरीरातील पाण्याची कमतरता (डिहायड्रेशन) काही वेळा ही स्थिती गंभीर स्वरूप धारण करू शकते.
कच्चे अंडे खाणे कोणी टाळावे?
आरोग्यतज्ज्ञांच्या मते खालील व्यक्तींनी कच्चे अंडे किंवा त्यापासून बनवलेल्या पदार्थांचे सेवन टाळावे :
गर्भवती महिला, लहान मुले, ज्येष्ठ नागरिक, कमी प्रतिकारशक्ती असलेले लोक, गंभीर आजारांनी त्रस्त रुग्ण या गटांमध्ये साल्मोनेला संसर्गाचा धोका अधिक असतो आणि तो कधीकधी जीवघेणाही ठरू शकतो.
सुरक्षित राहण्यासाठी काय करावे?
अंड्यातील सर्व पोषक तत्त्वे सुरक्षितपणे मिळवण्यासाठी ते उकडून किंवा ऑम्लेट करून खाणे अधिक योग्य आहे.
अंड्याचा पांढरा आणि पिवळा दोन्ही भाग पूर्णपणे शिजला पाहिजे.
उष्णतेमुळे साल्मोनेला जीवाणू नष्ट होतो.
शिजवलेले अंडे शरीराला प्रथिने अधिक प्रभावीपणे शोषून घेण्यास मदत करते.
कच्चे अंडे खाल्ल्याने विशेष फायदा होतो, याचा ठोस वैज्ञानिक पुरावा नाही. उलट ते पचण्यास कठीण असते आणि साल्मोनेला संसर्गाचा धोका वाढवते. त्यामुळे आरोग्याच्या दृष्टीने शिजवलेले अंडे खाणे अधिक सुरक्षित आणि फायदेशीर मानले जाते.
