पुढारी ऑनलाईन डेस्क : हैदराबादचे सलामीवीर ट्रॅव्हिस हेड आणि अभिषेक शर्मा यांच्या स्फोटक खेळीनंतर शहबाज अहमदच्या अर्धशतकाच्या जोरावर सनरायझर्स हैदराबादने दिल्ली कॅपिटल्ससमोर 267 धावांचे लक्ष्य ठेवले. दिल्लीने नाणेफेक जिंकून हैदराबादला प्रथम फलंदाजीसाठी आमंत्रित केले. हैदराबादने तुफानी फलंदाजी करत 20 षटकांत सात गडी गमावून 266 धावा केल्या. हैदराबादसाठी ट्रॅव्हिस हेडने 32 चेंडूंत 11 चौकार आणि सहा षटकारांच्या मदतीने 89 धावा केल्या, तर शाहबाज 29 चेंडूंत दोन चौकार आणि पाच षटकारांच्या मदतीने नाबाद 59 धावा करून पॅव्हेलियनमध्ये परतला. चायनामन गोलंदाज कुलदीप यादवने दिल्ली कॅपिटल्ससाठी अप्रतिम गोलंदाजी करत चार षटकांत 55 धावा देत चार बळी घेतले.
प्रथम फलंदाजी करताना हेड आणि अभिषेक यांनी शानदार खेळी करत बिनबाद 125 धावा केल्या. ही आयपीएलच्या इतिहासातील पॉवरप्लेमध्ये केलेली सर्वोच्च धावसंख्या आहे. यापूर्वी, पॉवरप्लेमध्ये सर्वोच्च धावसंख्या केकेआरच्या नावावर होती. त्यांनी 2017 साली आरसीबीविरुद्ध बिनबाद 105 धावा केल्या होत्या. हेड आणि अभिषेकने प्रत्येक गोलंदाजावर निशाणा साधला. हेडने 16 चेंडूत अर्धशतक झळकावले. पॉवरप्लेमध्ये हेड आणि अभिषेकची फलंदाजी पाहून हैदराबाद पुन्हा एकदा आपला विक्रम मोडेल आणि आयपीएलमधील सर्वोच्च धावसंख्या करेल, असे वाटत होते, पण पॉवरप्ले संपताच कुलदीप यादवने अभिषेक शर्माला बाद करून ही भागीदारी तोडली. अभिषेक 12 चेंडूत 46 धावा करून बाद झाला. तो बाद होताच हैदराबादचा डाव फसला आणि काही वेळातच संघाने चार विकेट गमावल्या.
कुलदीपने हेडलाही शतक झळकावण्यापासून रोखले. मात्र, अखेर शाहबाज अहमदने स्फोटक खेळी करत संघाची धावसंख्या 260 च्या पुढे नेली. हैदराबाद संघ आयपीएलच्या इतिहासात तीन वेळा 250 हून अधिक धावा करणारा एकमेव संघ ठरला आहे. याआधी याच मोसमात हैदराबादने मुंबई इंडियन्सविरुद्ध तीन गड्यांच्या मोबदल्यात 277 धावा आणि आरसीबीविरुद्ध तीन विकेट्सवर 287 धावा केल्या होत्या. गोलंदाजीमध्ये दिल्लीच्या कुलदीप यादवने सर्वाधिक 4 तर मुकेश कुमार आणि अक्षर पटेल यांनी प्रत्येकी 1 विकेट घेतली.
(DC vs SRH)
सनरायझर्स हैदराबाद : अभिषेक शर्मा, ट्रॅव्हिस हेड, एडन मार्कराम, हेनरिक क्लासेन (विकेटकीपर), अब्दुल समद, नितीश रेड्डी, पॅट कमिन्स (कर्णधार), भुवनेश्वर कुमार, मयंक मार्कंडे, टी. नटराजन.
इम्पॅक्ट प्लेयर : उमरान मलिक, अनमोलप्रीत सिंग, आकाश महाराज सिंग, ग्लेन फिलिप्स, वॉशिंग्टन सुंदर.
दिल्ली कॅपिटल्स : डेव्हिड वॉर्नर, जॅक फ्रेझर मॅकगर्क, अभिषेक पोरेल, ऋषभ पंत (कर्णधार/ विकेटकीपर), ट्रिस्टन स्टब्स, अक्षर पटेल, ललित यादव, कुलदीप यादव, ॲनरिक नॉर्टजे, खलील अहमद, मुकेश कुमार.
इम्पॅक्ट प्लेयर : पृथ्वी शॉ, शाई होप, प्रवीण दुबे, रशीख दार सलाम, सुमित कुमार.
हेही वाचा :
