बेळगाव : युवावर्गाच्या मोठ्या सहभागात काळ्या दिनाच्या फेरीत अभूतपूर्व जोश आणि झंझावात दिसून आला. जिल्हा प्रशासन आणि पोलिसांची दडपशाही झुगारून हजारो युवक रस्त्यात उतरल्याने काळ्या दिनाची फेरी यशस्वी ठरली. या फेरीतून मराठी जनतेच्या लढ्याला नवा जोश मिळाला आहे. त्यामुळे कर्नाटकी दंडेलशाहीला सणसणीत चपराक बसली असून 69 वर्षांनंतरही महाराष्ट्रात समाविष्ट होण्याची इच्छा तसूभरही कमी झाली नाही, हे दाखवून दिले
मध्यवर्ती महाराष्ट्र एकीकरण समितीने महिनाभरापूर्वीच 1 नोव्हेंबर रोजी काळा दिन पाळून केंद्र सरकारला मराठी जनतेच्या भावना दर्शवण्यात येणार असल्याचे जाहीर केले होते; पण दरम्यानच्या काळात पोलिस आणि जिल्हा प्रशासनाने महाराष्ट्र एकीकरण समितीवर दबाव टाकण्याचा प्रयत्न केला. यंदा काळ्यादिनाच्या फेरीला परवानगी देण्यात येणार नाही. काळादिन पाळता येणार नाही, काळादिन पाळल्यास कारवाई करू, म. ए. समिती नेत्यांवर दंडात्मक कारवाई करण्याच्या नोटिसा धाडल्या, सोशल मीडियावर काळ्या दिनाची जागृती करणार्यांवर कारवाईचा इशारा दिला; पण अनेक प्रयत्न करूनही कर्नाटकी प्रशासनाला मराठी माणसांच्या मनातील मराठी भाषा आणि महाराष्ट्रात जाण्याची इच्छा मिटवता आली नाही, हे आज झालेल्या निषेध फेरीतून दिसून आले.
केंद्र सरकारने 1956 मध्ये केलेल्या भाषावार प्रांतरचनेत बेळगाव, कारवार, बिदर, भालकीसह सीमावर्ती भागातील मराठी भाषिकांना अन्यायाने कर्नाटकात डांबण्यात आले. त्याच्या निषेधार्थ महाराष्ट्र एकीकरण समिती 1 नोव्हेंबर रोजी काळा दिन पाळत आली आहे. आजही समितीने काळा दिन गांभीर्याने पाळून केंद्र सरकारने आपल्यावर केलेल्या अन्यायाचा निषेध केला. शनिवारी सकाळी आठ वाजल्यापासूनच
संभाजी उद्यान येथे पोलिसांनी मोठा बंदोबस्त ठेवला होता. मैदानातच शंभरभर पोलिस थांबून होते. शहरात ठिकठिकाणी नाकेबंदी करून मराठी जनतेवर दबाव घालण्याचा आटोकाट प्रयत्न करण्यात येत होता; पण सकाळी 9 नंतर कार्यकर्ते जमण्यास सुरुवात झाली. साडेनऊ वाजता फेरीला सुरुवात झाली. या फेरीत लहान मुले, महिला, युवक आणि इतर कार्यकर्ते, नेते मोठ्या संख्येने सहभागी झाले होते.
धर्मवीर संभाजी उद्यान येथून फेरीला सुरुवात झाली. त्यानंतर चोन्नद स्टील, महाद्वार रोड, गजाननराव भातकांडे शाळा, एसपीएम रोड, कपिलेश्वर उड्डाणपूल, ताशिलदार गल्ली, भांदूर गल्ली, अंबाभुवन गल्ली, शिवाजी रोड, शेरी गल्ली कॉर्नर, हेमू कलानी चौक, कपिलेश्वर उड्डाण पूल, एसपीएम रोड, शिवाजी उद्यान, गरगट्टी कारखाना, गाडे मार्ग, बसवाण गल्ली, विठ्ठलदेव गल्ली, सराफ गल्ली, गणेशपूर गल्ली, जेड गल्ली, कोरे गल्ली, कचेरी गल्ली, मिरापूर गल्ली, खडे बाजार, बँक ऑफ इंडिया, महात्मा फुले रोड, गोवावेस सर्कल यामार्गे मराठा मंदिरपर्यंत फेरी काढण्यात आली.
काळ्यादिनाच्या फेरीत संयुक्त महाराष्ट्राचा गजर करण्यात आला. याशिवाय छत्रपती शिवाजी महाराजांचा जयजयकार झाला. कर्नाटकी अत्याचाराविरोधात, बेळगावच्या नामांतराविरोधात, मराठी भाषिकांवर होत असलेल्या अन्यायाविरोधात जोरदार घोषणाबाजी करण्यात आली. भगवे आणि काळे ध्वज लोकांचे लक्ष वेधून घेत होते. तर विविध घोषणांचे फलकही दर्शवण्यात आले होते. महाराष्ट्र एकीकरण समितीचे कार्यकर्ते ठिकठिकाणी थांबून होते. युवा वर्गाच्या मोठ्या सहभागामुळे संपूर्ण निषेध फेरीत चैतन्य निर्माण झाले होते. लहान मुलांनीही फेरीत सहभाग घेऊन अखंड घोषणाबाजी केली.
या फेरीत मध्यवर्ती समिती कार्याध्यक्ष मनोहर किणेकर, सरचिटणीस मालोजी अष्टेकर, प्रकाश मरगाळे, रणजित चव्हाण-पाटील, रमाकांत कोंडुसकर, आर. एम. चौगुले, आर. आय. पाटील, नगरसेवक रवी साळुंखे, शिवाजी मंडोळकर, बी. ओ. येतोजी, महेश जुवेकर, दत्ता जाधव, राजू किणयेकर, जिल्हा पंचायत माजी सदस्या सरस्वती पाटील, माजी महापौर सरिता पाटील, रेणू किल्लेकर, मदन बामणे, माजी नगरसेविका सुधा भातकांडे, विनोद आंबेवाडीकर, युवा समिती अध्यक्ष अंकुश केसरकर, अॅड. एम. जी. पाटील, युवा समिती नेते शुभम शेळके, श्रीकांत मांडेकर, संतोष कृष्णाचे, यल्लाप्पा रेमाण्णाचे, दुद्दाप्पा बागेवाडी, प्रकाश अष्टेकर, शिवाजी खांडेकर, अमित देसाई, अॅड. महेश बिर्जे, आर. के. पाटील, गणेश दड्डीकर, सागर पाटील, अॅड. अमर यळ्ळूरकर, शिवानी पाटील, चंद्रकांत कोंडुसकर, नेताजी जाधव, विजय भोसले, मल्लाप्पा गुरव, महादेव गुरव, नागेश राजगोळकर, दत्ता कांबळे, सागर सांगावकर, अप्पासाहेब गुरव, रावजी पाटील, अंकुश पाटील, कमल मन्नोळकर आदी उपस्थित होते. या फेरीत पोलिसांचा मोठा बंदोबस्त होता.
शनिवारी निघालेल्या फेरीत दुपारी 12 वाजता जोरदार पाऊस सुरू झाला. पण या पावसातही फेरीत सहभागी मराठी जनतेने आपला निर्धार कायम ठेवला होता. गगनभेदी घोषणा देत फेरी काढण्यात आली. या पावसामुळे पोलिसांची मात्र तारांबळ उडाली.
काळ्यादिनाच्या फेरीत संयुक्त महाराष्ट्राचा गजर करण्यात आला. याशिवाय छत्रपती शिवाजी महाराजांचा जयजयकार झाला. भगवे आणि काळे ध्वज मोठ्या प्रमाणात होते. कर्नाटकी अत्याचाराविरोधात, बेळगावच्या नामांतराविरोधात, मराठी भाषिकांवर होत असलेल्या अन्यायाविरोधात जोरदार घोषणाबाजी करण्यात आली. तर विविध घोषणांचे फलकही दर्शवण्यात आले होते. गोवावेस येथील कार्यकर्त्यांचा फलक लक्षवेधी होता.
सकाळी आठपासूनच संभाजी उद्यानात पोलिसांची गर्दी
सकाळी 9 वाजता लोक एकत्र येऊ लागले.
तानाजी गल्लीतील रेल्वे गेटमुळे मार्गात बदल
कपिलेश्वर उड्डाणपुलावरून दोनवेळा फेरी
फेरीत मोठा पोलीस बंदोबस्त
युवावर्गाच्या सहभागामुळे फेरीत चैतन्य
काळे कपडे, काळ्या आणि भगव्या ध्वजांचा मोठ्या प्रमाणात समावेश
ग्रामीण भागातूनही युवकांचा मोठा सहभाग
