कोल्हापूर, पुढारी वृत्तसेवा : दैनिक 'पुढारी'तर्फे आयोजित टूर्स अँड ट्रॅव्हल्स एक्झिबिशनमध्ये कोल्हापूर आणि परिसरातील पर्यटकांना आपल्या सुट्टीचे योग्य नियोजन करण्याची उत्तम संधी आहे. या प्रदर्शनात त्यांना देशांतर्गत आणि आंतरराष्ट्रीय टूर्सचे विविध पर्याय उपलब्ध आहेत, असे गौरवोद्गार वैद्यकीय शिक्षण आणि विशेष सहाय्य मंत्री हसन मुश्रीफ यांनी काढले. अ हेवन हॉलिडेज प्रस्तूत दैनिक 'पुढारी टूर्स अॅन्ड ट्रॅव्हल्स एक्झिबिशन – 2023' पॉवर्ड बाय गगन टूर्स या प्रदर्शनाचे उद्घाटन मुश्रीफ यांच्या हस्ते झाले. यावेळी ते बोलत होते.
या प्रदर्शनात अनेक नामवंत टूर ऑपरेटर्स कंपन्या सहभागी झाल्या आहेत. त्यामुळे सुट्टीचे प्लॅनिंग करण्यासाठी अनेक पर्याय नागरिकांना मिळत आहेत. एकाच ठिकाणी अनेक पर्याय उपलब्ध असल्याने कमी खर्चाची आणि आपल्याला हवी तशी टूर पॅकेज निवडण्याची संधी पर्यटकांना मिळेल, असेही मंत्री मुश्रीफ यांनी यावेळी सांगितले.
अतुल्य भारत, भारत सरकारचा पर्यटन विभाग या एक्झिबिशनचा सहप्रायोजक आहे. पर्यटन माहिती अधिकारी अक्षय कल्याणकर, हेवन हॉलिडेजचे राजेंद्र बुगडे, गगन टूर्सच्या नंदिनी खुपेरकर दैनिक 'पुढारी'चे समूह सरव्यवस्थापक अनिल पाटील, समूह कार्यकारी संपादक सुरेश पवार, जनरल मॅनेजर (ऑपरेशन्स) राजेंद्र मांडवकर यावेळी उपस्थित होते.
कोरोना साथीनंतर लोकांचा पर्यटनाकडे ओघ वाढला असून ठरावीक वर्गापुरती मर्यादित असलेली पर्यटनाची क्रेझ आता समाजाच्या विविध स्तरांत पोहोचली आहे. प्रत्येक जण आपल्या आर्थिक क्षमतेनुसार पर्यटनासाठी सवड काढताना दिसत आहे. या बदलत्या ट्रेंडला अनुसरून पर्यटनाच्या नवनव्या डेस्टीनेशन्सच्या शोधात असलेल्यांसाठी दै. 'पुढारी'ने पर्यटनाचे भरगच्च पर्याय असलेले हे प्रदर्शन आयोजित केले आहे.
भ्रमंतीतील अनेक पर्यायांची माहिती व पर्यटकांच्या मनातील पर्यटनविषयक प्रश्नांची उत्तरे देणारे हे प्रदर्शन आहे. देश-विदेशातील टूर्स पॅकेजेसचे अनेक पर्याय देणार्या पर्यटन संस्थांचा यात सहभाग आहे. तीन दिवस चालणार्या या प्रदर्शनात पर्यटकांना वेगवेगळ्या टूर्स अँड ट्रॅव्हल्स संस्थांकडून विविध पॅकेजेसची माहिती एकाच छताखाली उपलब्ध आहे. पाच हजार ते पाच लाखांपर्यंत बजेट असलेल्या टूर्सबद्दल एकाच ठिकाणी माहिती घेण्याच्या या संधीचा लाभ घेण्यासाठी अनेक पर्यटक गर्दी करत आहेत. विविध टूर्सवर भरघोस डिस्काऊंट, महिला मंडळे, संस्था तसेच ग्रुप बुकिंगवर विशेष सवलती, सर्वसामान्यांच्या बजेटमधील सहली हे या प्रदर्शनाचे वैशिष्ट्य आहे. प्रदर्शनात नामांकित पर्यटन संस्थांनी सादर केलेल्या वैविध्यपूर्ण टूर पॅकेजेसचे थेट बुकिंगही उपलब्ध आहे.
यामध्ये पर्यटकांना हिवाळी आणि उन्हाळी पर्यटनासाठीच्या विविध बजेटमधील, तसेच उत्तम सोयीसुविधा पुरवणार्या टूर्स आणि ट्रॅव्हल्स कंपन्यांचा समावेश आहे. या प्रदर्शनातून पर्यटकांना देश-विदेशातील सहलींबरोबरच पर्यटनाच्या माहितीचा खजिना खुला होणार आहे.
ज्येष्ठांसाठी तीर्थयात्रा, धार्मिक ठिकाणे, नवदाम्पत्यांसाठी खास हनिमून पॅकेजेस, कृषी पर्यटन, अभ्यास सहलींचा प्रदर्शनात समावेश आहे. स्थानिक पर्यटन संस्थांसह जगप्रसिद्ध विविध संस्था, नामवंत टूर्स अँड ट्रॅव्हल्स कंपन्या प्रदर्शनात सहभागी आहेत. हे प्रदर्शन सर्वांसाठी विनामूल्य असून नागरिकांनी मोठ्या संख्येने भेट द्यावी, असे आवाहन करण्यात आले आहे.
एक्झिबिशनमध्ये सहभागी संस्था
इंडिया टुरिझम, गगन टूर्स, हेवन हॉलिडेज, फ्लॅमिंगो हॉलिडेज, हॉलिडे स्टोअर इंडिया, क्वेस्ट टूर्स, भोसले टूर्स अँड ट्रॅव्हल्स, गिरीकंद ट्रॅव्हल्स प्रायव्हेट लिमिटेड, थॉमस कुक इंडिया प्रायव्हेट लिमिटेड, मिरॅकल हॉलिडेज, चौधरी यात्रा कंपनी प्रायव्हेट लिमिटेड, मँगो हॉलिडेज, एलपीओ हॉलिडेज, एसओटीसी हॉलिडेज, एम.डी. टूर्स, विश्रांती टूर्स, ट्रॅव्हल पॉईंट, श्री सिद्धिविनायक टूर्स, बीजी टूर्स कोल्हापूर, क्लब महिंद्रा, मेक माय ट्रीप आदी.
हे ही वाचा :