IPL 2026 Playoff Scenarios
इंडियन प्रीमियर लीग (IPL 2026) चा थरार आता निर्णायक टप्प्यात पोहोचला आहे. यंदाच्या हंगामातील ५६ सामने मंगळवार, १२ मे पर्यंत पार पडले आहेत. आता केवळ १४ लीग सामने शिल्लक आहेत. लखनऊ सुपर जायंट्स (LSG) आणि मुंबई इंडियन्स (MI) स्पर्धेतून बाहेर पडले असून दिल्ली कॅपिटल्स (DC) चे अस्तित्वही धोक्यात आले आहे. गुजरात टायटन्स (GT) ने प्ले-ऑफमधील आपले स्थान जवळपास निश्चित केले आहे. IPL 2026 चा ५६ वा लीग सामना १२ मे रोजी गुजरात टायटन्स आणि सनरायझर्स हैदराबाद यांच्यात खेळला गेला. या सामन्यात गुजरातने विजय मिळवत १६ गुणांची कमाई केली आहे. १६ गुणांसह गुजरातचा संघ आरामात प्ले-ऑफसाठी पात्र ठरू शकतो. टॉप-४ मध्ये स्थान मिळवण्यासाठी कोणत्या संघाकडे किती टक्के संधी आहे, हे जाणून घेऊया.
गुजरातचे स्थान पक्के
गुजरात टायटन्स (GT): गुणतालिकेत अव्वल स्थानी असलेल्या गुजरातची प्ले-ऑफमध्ये पोहोचण्याची संधी आता ९९.६ टक्के झाली आहे. गुजरातच्या खात्यात १६ गुण असून त्यांचे दोन सामने अद्याप बाकी आहेत. तसेच, टॉप-२ मध्ये राहण्याची त्यांची संधी ८४.५ टक्के आहे.
रॉयल चॅलेंजर्स बेंगळुरू (RCB): आरसीबी गुणतालिकेत दुसऱ्या स्थानावर असून त्यांच्या प्ले-ऑफची संधी ८८.१ टक्के आहे, तर टॉप-२ मध्ये 'फिनिश' करण्याची संधी ५९ टक्के आहे.
सनरायझर्स हैदराबाद टॉप-२ मध्ये जाण्याची शक्यता ३५.५ टक्के
सनरायझर्स हैदराबाद (SRH): गुजरातकडून मिळालेल्या पराभवामुळे हैदराबादच्या अडचणी वाढल्या आहेत. त्यांची प्ले-ऑफची संधी ८० टक्क्यांवरून घसरून ७६.८ टक्के झाली आहे. टॉप-२ मध्ये स्थान मिळवण्याची त्यांची शक्यता ३५.५ टक्के आहे.
पंजाब किंग्स (PBKS): पंजाबचा संघ सध्या चौथ्या क्रमांकावर असून त्यांची संधी किंचित वाढली आहे. गुजरात-हैदराबाद सामन्यापूर्वी त्यांची संधी ६२.५ टक्के होती, ती आता ६४.५ टक्के झाली आहे. टॉप-२ साठी त्यांची २८.८ टक्के शक्यता आहे.
चेन्नई सुपर किंग्स (CSK): पाचव्या क्रमांकावर असलेला चेन्नईचा संघही शर्यतीत आहे. सीएसकेची टॉप-४ मध्ये जाण्याची संधी ५३.९ टक्के आहे, तर टॉप-२ मध्ये स्थान मिळवण्याची शक्यता २२ टक्के आहे.
राजस्थान रॉयल्स (RR): राजस्थानची टॉप-४ मध्ये पोहोचण्याची संधी ५३.८ टक्के असून टॉप-२ साठी त्यांच्याकडे १८.२ टक्के संधी आहे.
कोलकाता नाईट रायडर्स (KKR): केकेआर अजूनही शर्यतीत असून त्यांच्या प्ले-ऑफची संधी १२.८ टक्के आहे, मात्र टॉप-२ मध्ये जाण्याची शक्यता केवळ ३.६ टक्के आहे. दिल्ली जास्तीत जास्त १४ गुणांपर्यंत पोहोचू शकते. तरीही त्यांची टॉप-४ मध्ये जाण्याची शक्यता केवळ १ टक्का उरली आहे. दिल्लीचा संघ जास्तीत जास्त तिसऱ्या क्रमांकापर्यंत मजल मारू शकतो; टॉप-२ मध्ये जाण्याची त्यांची संधी आता संपुष्टात आली आहे.
मुंबई इंडियन्स (MI): ११ पैकी केवळ ३ सामने जिंकल्यामुळे मुंबईचा संघ प्ले-ऑफच्या शर्यतीतून बाहेर पडला आहे. तसेच लखनऊ सुपर जायंट्स (LSG): लखनऊचा संघही आता टॉप-४ मध्ये जाऊ शकणार नाही. त्यांनी ११ पैकी ८ सामने गमावले आहेत.