IND vs IRE 2nd T20 : भारत आणि आयर्लंड यांच्यातील दुसरा टी-२० सामना आज खेळवला जाणार आहे. बेलफास्ट येथे खेळवल्या जाणाऱ्या या सामन्यात भारताने वेगवान गोलंदाज प्रिन्स यादव आणि अष्टपैलू खेळाडू सूर्यांश शेडगे यांना या सर्वात लहान फॉरमॅटमध्ये पदार्पणाची संधी दिली आहे. दरम्यान, वैभव सूर्यवंशीची मात्र पुन्हा एकदा निराशा झाली आहे. त्याला आता आपल्या पदार्पणासाठी इंग्लंड मालिकेची वाट पाहावी लागणार आहे.
भारतीय संघ रविवारी ही दोन सामन्यांची मालिका बरोबरीत सोडवण्याच्या इराद्याने मैदानात उतरेल. श्रेयस अय्यरचे तब्बल ९६० हून अधिक दिवसांनंतर टी-२० आंतरराष्ट्रीय क्रिकेटमध्ये पुनरागमन झाले असून, त्याचे कर्णधारपदावरील पदार्पण तितकेसे चांगले राहिले नाही. त्यामुळे आता कोणत्याही परिस्थितीत आयर्लंड दौऱ्याचा शेवट विजयाने करण्याचा त्याचा प्रयत्न असेल.
मालिकेतील पहिल्या सामन्यात भारताला ३४ धावांनी पराभवाचा सामना करावा लागला होता. कोणत्याही फॉरमॅटमध्ये आयर्लंडचा भारतावरील हा पहिलाच विजय ठरला. या सामन्यात भारतीय फलंदाजांनी प्रचंड निराशा केली होती. संजू सॅमसन, ईशान किशन आणि स्वतः कर्णधार अय्यर यांना दुहेरी धावसंख्याही गाठता आली नव्हती.
एका पराभवानंतर संघ व्यवस्थापन घाईघाईने कोणताही निर्णय घेण्याच्या मनस्थितीत नाही. असे असले तरी, युवा खळबळ वैभव सूर्यवंशीला आज आंतरराष्ट्रीय पदार्पणाची संधी मिळते की नाही, याकडे सर्वांचे लक्ष लागून राहील होते. मात्र या सामन्यात त्याला संधी देण्यात आलेली नाही. त्यामुळे पुन्हा एकदा त्याच्या पदरी निराशा पडली आहे. त्याला आता आपल्या पदार्पणासाठी इंग्लंड मालिकेची वाट पाहावी लागणार आहे.
भारतीय संघ : अभिषेक शर्मा, संजू सॅमसन (डब्ल्यू), इशान किशन, श्रेयस अय्यर (क), टिळक वर्मा, शिवम दुबे, सूर्यांश शेडगे, अक्षर पटेल, हर्षित राणा, अर्शदीप सिंग, प्रिन्स यादव
आयर्लंड संघ : टिम टेक्टर, रॉस अडायर, हॅरी टेक्टर, लॉर्कन टकर (डब्ल्यू/सी), बेंजामिन कॅलिट्झ, गॅरेथ डेलेनी, जॉर्ज डॉकरेल, लियाम मॅककार्थी, मॅथ्यू हम्फ्रे, जय मुंद्रा, मॅथ्यू हॉलर्ड