Harshit Rana all-rounder vs Hardik Pandya position in danger
इंदूर : भारतीय वनडे संघाचा कर्णधार शुभमन गिलने युवा वेगवान गोलंदाज हर्षित राणाचे कौतुक करताना शब्दांची उधळण केली आहे. न्यूझीलंडविरुद्धच्या घरच्या मैदानातील ऐतिहासिक मालिका पराभवानंतर हर्षित राणाची अष्टपैलू कामगिरी भारतीय संघासाठी 'दुखात सुखाची झुळूक' ठरली आहे.
भारतीय संघाला गेल्या अनेक दिवसांपासून एका अशा वेगवान गोलंदाजाची प्रतीक्षा होती जो खालच्या क्रमांकावर उपयुक्त फलंदाजी करू शकेल. २४ वर्षीय हर्षित राणाने या मालिकेत नेमकी हीच उणीव भरून काढली. ‘हर्षितसारखे गोलंदाज दुर्मिळ आहेत, जे १४० किमी प्रतितास वेगाने सातत्याने गोलंदाजी करतात आणि त्यांच्याकडे लाभलेली उंची ही जमेची बाजू आहे. जर त्याने आपल्या फलंदाजीत अशीच सुधारणा सुरू ठेवली, तर तो भविष्यातील एक उत्तम अष्टपैलू खेळाडू ठरेल,’ अशा शब्दांत गिलने त्याचे कौतुक केले.
हार्दिक पंड्या वारंवार दुखापतींनी त्रस्त असताना, हर्षित राणाच्या प्रगतीमुळे भारतीय संघाला एक नवा पर्याय मिळाला आहे. पुढील वर्षी दक्षिण आफ्रिकेत होणाऱ्या विश्वचषकासाठी पंड्या आणि राणा हे दोन्ही खेळाडू संघात असणे, हे भारतीय क्रिकेटसाठी एक आदर्श समीकरण ठरेल.
मालिकेतील अखेरच्या सामन्यात न्यूझीलंडने दिलेल्या ३३९ धावांच्या आव्हानाचा पाठलाग करताना भारतीय फलंदाजी ढेपाळली होती. मात्र, आठव्या क्रमांकावर आलेल्या राणाने आपल्या निर्भीड फलंदाजीने सर्वांना चकित केले. त्याने ४३ चेंडूंत ५२ धावांची खेळी करत आपले पहिले आंतरराष्ट्रीय अर्धशतक झळकावले. त्याने विराट कोहलीसोबत सातव्या विकेटसाठी ९९ धावांची महत्त्वपूर्ण भागीदारी केली. राणाच्या खेळीत ८ चौकार आणि ४ उत्तुंग षटकारांचा समावेश होता. त्याच्या फलंदाजीत आक्रमकता असली तरी त्यामागे एक अचूक नियोजन पाहायला मिळाले.
हर्षित राणाला एका कच्च्या गोलंदाजापासून आक्रमक अष्टपैलू खेळाडू बनवण्यात प्रशिक्षक गौतम गंभीर यांचा मोलाचा वाटा आहे. गंभीरने राणाला कोलकाता नाईट रायडर्समध्ये (KKR) आणि आता भारतीय संघात जवळून मार्गदर्शन केले आहे. सरावादरम्यान गंभीर तासनतास राणाच्या फलंदाजीवर लक्ष केंद्रित करताना दिसतात, ज्याचा सकारात्मक परिणाम मैदानावरील कामगिरीत दिसून येत आहे. ‘माझ्या संघ व्यवस्थापनाला मी क्रमांक ८ वर एक अष्टपैलू म्हणून खेळावे असे वाटते आणि त्यासाठी मी नेटमध्ये कठोर मेहनत घेत आहे,’ असे राणाने सामन्यानंतर नमूद केले.
दुसरीकडे, भारतीय संघाचा 'चेस मास्टर' विराट कोहलीने पुन्हा एकदा आपल्या बॅटची जादू दाखवली. त्याने १०८ चेंडूंत १२४ धावा फटकावून आपले ५४ वे एकदिवसीय आणि एकूण ८४ वे आंतरराष्ट्रीय शतक साजरे केले. विराटने आपल्या खेळीत १० चौकार आणि ३ षटकार लगावत विजय मिळवून देण्याचा आटोकाट प्रयत्न केला, मात्र दुसऱ्या टोकाकडून त्याला साथ लाभली नाही. इंदूरच्या होळकर स्टेडियमवर भारताचा हा पहिलाच पराभव ठरला.
विराटने नितीश रेड्डी आणि हर्षित राणा या तरुणांना मार्गदर्शन करत डाव सावरण्याचा प्रयत्न केला, पण अनुभवाची कमतरता नडल्याने भारताला ३७ वर्षांत पहिल्यांदाच किवींविरुद्ध मायदेशात मालिका गमवावी लागली.