Hardik Pandya Trade to Punjab Kings : आयपीएलच्या २०२७ च्या हंगामापूर्वी क्रिकेट वर्तुळात एक मोठी घडामोड पाहायला मिळाली आहे. मुंबई इंडियन्सची साथ सोडल्यानंतर अष्टपैलू खेळाडू हार्दिक पांड्या आता पंजाब किंग्जच्या ताफ्यात दाखल झाला आहे. पंजाबच्या संघात समाविष्ट झाल्यानंतर हार्दिकने सोशल मीडियावर आपली पहिली प्रतिक्रिया देत चाहत्यांचे आणि संघाचे लक्ष वेधून घेतले आहे.
पंजाब किंग्जने मुंबई इंडियन्सकडून १८ कोटी रुपयांच्या बोलीवर हार्दिक पांड्याला आपल्या संघात ट्रेड केले आहे. तर दुसरीकडे, पंजाबचा स्टार वेगवान गोलंदाज अर्शदीप सिंग आता मुंबई इंडियन्सच्या गोटात सामील झाला आहे. अर्शदीपची १८ कोटींची विद्यमान रक्कम कायम ठेवत हा अदलाबदलीचा (ट्रेड) करार पूर्ण झाला असून, हार्दिकच्या मानधनात १६.३५ कोटींवरून १८ कोटींपर्यंत वाढ झाली आहे, अशी माहिती आयपीएल प्रशासनाकडून देण्यात आली.
पंजाबच्या ताफ्यात सामील झाल्यानंतर हार्दिक पांड्याने इन्स्टाग्रामवर एक खास संदेश शेअर केला आहे. यामध्ये त्याने पंजाबचा नवा कर्णधार श्रेयस अय्यर आणि मुख्य प्रशिक्षक रिकी पाँटिंग यांचा विशेष उल्लेख केला."सत श्री अकाल! माझा कर्णधार श्रेयस, माझे प्रशिक्षक रिकी, माझा संघ आणि संपूर्ण पंजाब... मी तुमच्यासोबत आणि तुमच्या पाठीशी ठामपणे उभा आहे!"— हार्दिक पांड्या
या मेगा ट्रेडमुळे हार्दिक पांड्याचा मुंबई इंडियन्ससोबतचा दुसरा कार्यकाळ संपुष्टात आला आहे. २०१५ मध्ये हार्दिक पहिल्यांदा मुंबईच्या संघात आला होता. २०१५, २०१७, २०१९ आणि २०२० च्या विजेतेपदात त्याने मोलाचे योगदान दिले होते. त्यानंतर २०२४ मध्ये मुंबईच्या ताफ्यात पुनरागमन करत त्याने रोहित शर्माकडून कर्णधारपदाची धुरा सांभाळली होती.
हार्दिकच्या आयपीएल कारकीर्दीवर नजर टाकल्यास, त्याने आतापर्यंत १६२ सामन्यांमध्ये १४६.२८ च्या स्ट्राईक रेटने २,९५५ धावा केल्‍या आहेत. तसेच ८२ बळी (विकेट्स) देखील घेतले आहेत.