Saif Ali Khan Bandra Flat Sale
मुंबई: बॉलिवूड अभिनेता सैफ अली खान याने मुंबईतील वांद्रे पश्चिम परिसरातील आपला ७९७ चौरस फुटांचा फ्लॅट ४.११ कोटी रुपयांना विकला आहे. या फ्लॅटसोबत खरेदीदाराला दोन खुल्या पार्किंगच्या जागाही मिळाल्या आहेत. सरकारी कागदपत्रांनुसार, या व्यवहाराची नोंदणी १९ ऑक्टोबर २०२६ रोजी झाली. विशेष म्हणजे, या फ्लॅटचा ताबा खरेदीदाराला तब्बल दोन वर्षांपूर्वीच, म्हणजेच ७ मार्च २०२४ रोजीच देण्यात आला होता.
हा फ्लॅट वांद्रे पश्चिम येथील 'हाय-कॉन्स रेसिडेन्सी' या इमारतीत आहे. या व्यवहारासाठी खरेदीदारांनी २४ लाख ६६ हजार रुपये एवढा मुद्रांक शुल्क भरला आहे. मालमत्ता बाजाराची माहिती देणारी संस्था 'CRE Matrix' कडून ही माहिती समोर आली आहे.
सैफ अली खानने ३० मार्च २००७ रोजी याच इमारतीमधील (हाय-कॉन्स रेसिडेन्सी) दोन वरच्या मजल्यांवर पसरलेली सुमारे ६ हजार चौरस फुटांची मोठी मालमत्ता 'हाय-कॉन कन्स्ट्रक्शन्स' या बिल्डरकडून ९.७ कोटी रुपयांना खरेदी केली होती. त्यासोबत पार्किंगची सुविधाही होती. पुढे जाऊन, १९ जून २०१४ रोजी या मोठ्या मालमत्तेचे तीन स्वतंत्र फ्लॅटमध्ये विभाजन करण्यात आले. एका मजल्यावर २,९९७ चौरस फुटांचा फ्लॅट, त्याच मजल्यावर २,२०५ चौरस फुटांचा दुसरा फ्लॅट आणि वरच्या मजल्यावर ७९७ चौरस फुटांचा लहान फ्लॅट. सैफने नुकताच विकलेला फ्लॅट हा याच तीन भागांपैकी एक आहे. या तिन्ही फ्लॅट्सची मिळून मूळ खरेदी किंमत ९.७ कोटी रुपये होती.
फ्लॅटविक्री व्यतिरिक्त, सैफ अली खानने मुंबईतील अंधेरी-कुर्ला रोडवरील दोन व्यावसायिक जागा भाड्याने दिल्या आहेत. या दोन्ही जागांचे मिळून क्षेत्रफळ ५,६९२ चौरस फूट असून, त्यापोटी त्याला दरमहा २२ लाख ७६ हजार रुपये भाडे मिळणार आहे. 'दुर्वा फिनटेक प्रायव्हेट लिमिटेड' या कंपनीला या जागा भाड्याने देण्यात आल्या आहेत. हा भाडेकरार २९ सप्टेंबर २०२६ रोजी झाला असून, १० मे २०२६ ते ९ मे २०३१ अशा पाच वर्षांच्या कालावधीसाठी हा करार असणार आहे. या कंपनीचे संचालक विकास मोहन सचदेव यांचा करारात परवानाधारक म्हणून उल्लेख आहे, तर सैफ अली खानने आपल्या अधिकृत प्रतिनिधीमार्फत ही जागा भाड्याने दिली आहे.
सैफ अली खानकडे मुंबईत इतरही आलिशान मालमत्ता आहेत. सध्या तो आपली पत्नी करीना कपूर खान आणि मुलांसोबत मुंबईतील 'सातगुरू शरण' या इमारतीमधील ६,५०० चौरस फुटांहून मोठ्या अपार्टमेंटमध्ये राहतो. एप्रिल २०१२ मध्ये त्याने ही मालमत्ता 'सातगुरू बिल्डर्स'कडून २३.५० कोटी रुपयांना खरेदी केली होती. याआधी सैफ आणि करीना वांद्रे येथील 'फॉर्च्यून हाइट्स' या प्रसिद्ध अपार्टमेंटमध्ये राहत होते. एप्रिल २०१६ मध्ये सैफने याच संकुलातील ९५० चौरस फुटांपेक्षा मोठा आणखी एक फ्लॅट ७ कोटी रुपयांना खरेदी केला होता.