Udta Teer Movie Review: बॉलिवूडमध्ये देशभक्ती, गुप्तहेरगिरी आणि विनोद यांची सांगड घालणारे चित्रपट अनेकदा पाहायला मिळतात. मात्र, हे सगळे घटक एकत्र आणताना प्रेक्षकांचे मनोरंजन करणे सोपे नसते. आयुष्मान खुराना आणि सारा अली खान यांची प्रमुख भूमिका असलेला ‘उड़ता तीर’ हा चित्रपटही याच प्रकारात मोडतो. गुप्तहेरांचे मिशन, मेमरी हरवलेला नायक आणि त्यातून निर्माण होणारा गोंधळ, अशा गोष्टींमधून चित्रपट विनोदाची फोडणी देण्याचा प्रयत्न करतो.
चित्रपटाची कथा काही ठिकाणी रेंगाळत असली, तरी विनोदी प्रसंग, अनपेक्षित वळणे आणि कलाकारांचा अभिनय यामुळे मनोरंजन होते. त्यामुळे हलकाफुलका चित्रपट पाहण्याची इच्छा असलेल्या प्रेक्षकांसाठी ‘उड़ता तीर’ हा चित्रपट खास आहे.
या चित्रपटात आयुष्मान खुराना याने विक्रांतची भूमिका साकारली आहे. विक्रांत स्वतःला भारतीय गुप्तचर यंत्रणा CTS चा अधिकारी समजतो. मात्र, कथेत एक मोठे वळण येते. तो प्रत्यक्षात बिलाल नावाचा पाकिस्तानी एजंट असतो. एका अपघातानंतर त्याची स्मरणशक्ती जाते आणि तो स्वतःची खरी ओळख विसरतो.
यानंतर सुरू होतो गोंधळ. स्वतःला भारतीय अधिकारी समजणारा विक्रांत आपल्याच लोकांच्या विरोधात उभा राहतो. यातून अनेक मजेशीर प्रसंग घडतात. चुकीची ओळख आणि गुप्तहेरगिरी यांची सांगड घालत चित्रपटात विनोद आणि थोडासा थरार निर्माण केला आहे.
चित्रपटाची सुरुवातीची सुमारे अर्धा तास कथा आणि पात्रांची ओळख करून देण्यात जातो. त्यामुळे सुरुवातीला चित्रपटाची गती थोडी मंद वाटू शकते. मात्र, कथा पुढे सरकताच वेगवेगळे प्रसंग आणि वळणे मनोरंजन करतात.
मध्यंतरानंतर काही भागांत पुन्हा गती कमी होते. तरीही, त्यानंतर चित्रपट पुन्हा रुळावर येतो. कथेत फार मोठे गूढ किंवा प्रेक्षकांना सतत विचार करायला लावणारा भाग नाही. मात्र, मध्येच येणारे विनोदी संवाद आणि प्रसंग हसवण्याचे काम करतात.
आयुष्मान खुराना नेहमीच वेगवेगळ्या प्रकारच्या भूमिका साकारण्यासाठी ओळखला जातो. ‘उड़ता तीर’मध्येही तो एका वेगळ्या भूमिकेत दिसतो. स्वतःची ओळख विसरलेल्या आणि दोन वेगवेगळ्या ओळखींच्या गोंधळात अडकलेल्या व्यक्तीची भूमिका त्याने चांगल्या प्रकारे साकारली आहे.
त्याच्या अभिनयातील निरागसपणा आणि गोंधळलेली देहबोली विनोदी प्रसंगांना अधिक रंगत आणतात. गंभीर प्रसंग आणि विनोद यांच्यात समतोल साधण्याचा त्याचा प्रयत्न दिसून येतो. चित्रपटाची कथा काही ठिकाणी कमकुवत वाटत असली, तरी आयुष्मानचा अभिनय मनोरंजनात भर घालतो.
या चित्रपटातील राहुल बोसचा अभिनय विशेष लक्ष वेधून घेतो. त्यांना अशा प्रकारच्या विनोदी भूमिकेत पाहणे प्रेक्षकांसाठी वेगळा अनुभव आहे. त्यांच्या विनोदी अभिनयातील सहजता आणि योग्य वेळी आलेले संवाद चित्रपटातील अनेक प्रसंग रंगतदार बनवतात.
काही दृश्यांमध्ये राहुल बोस आयुष्मान खुरानालाही मागे टाकतात, असे चित्रपट पाहताना जाणवते. त्यांच्या भूमिकेमुळे कथेतला विनोद अधिक खुलतो. त्यामुळे चित्रपटातील लक्षात राहणाऱ्या कलाकारांमध्ये राहुल बोसचे नाव नक्कीच घेतले जाऊ शकते.
दिवंगत अभिनेते मुकुल देव यांची उपस्थितीही या चित्रपटातील महत्त्वाचा भाग आहे. त्यांच्या अभिनयामुळे कथेला आधार मिळतो. पडद्यावर त्यांना पाहणे चाहत्यांसाठी भावूक अनुभव ठरू शकतो. त्यांच्या चित्रपटप्रवासाची आठवण करून देणारा हा चित्रपट त्यांच्या चाहत्यांसाठी विशेष ठरू शकतो. त्यांच्या भूमिकेतील कामामुळे कथेतही वेगळी छाप उमटते.
सारा अली खान आणि स्मिता तांबे यांनी आपापल्या भूमिका योग्य प्रकारे साकारल्या आहेत. सुहैल नैय्यर यालाही चांगली भूमिका मिळाली असून, त्याने या संधीचं सोनं केलं आहे.
याशिवाय राम कपूर, बृजेंद्र काला आणि गुलशन ग्रोव्हर यांच्याही भूमिका चित्रपटात रंगत आणतात. सहाय्यक कलाकारांच्या अभिनयामुळे अनेक प्रसंग अधिक मनोरंजक होतात. कलाकारांची फळी चांगली असली, तरी प्रत्येक पात्राला समान संधी मिळतेच असे नाही.
चित्रपटातील गाणी फारशी लक्षात राहत नाहीत. ती सामान्य स्वरूपाची वाटतात. मात्र, पार्श्वसंगीतामुळे काही प्रसंग अधिक प्रभावी होतात. विनोदी दृश्ये आणि थरार निर्माण करणाऱ्या प्रसंगांमध्ये पार्श्वसंगीताची साथ चांगली मिळते.
छायाचित्रण आणि संकलनही समाधानकारक आहे. मात्र, काही ठिकाणी संकलन अधिक चांगले असते, तर चित्रपटाची गती सुधारली असती. कथेत अनावश्यक वाटणारे काही भाग कमी केले असते, तर मनोरंजनाचा अनुभव आणखी चांगला झाला असता.
दिग्दर्शक आणि लेखक आकाश ए. कौशिक यांनी देशभक्ती, अ‍ॅक्शन, गुप्तहेरगिरी आणि विनोद यांचा मेळ घालण्याचा प्रयत्न केला आहे. काही प्रसंगांमध्ये कथा अपेक्षित वेगाने पुढे जात नाही. तसेच, चित्रपटात मोठ्या ससपेन्सची अपेक्षा ठेवणाऱ्या प्रेक्षकांची थोडी निराशा होऊ शकते. मात्र, आयुष्मान खुरानाचा वेगळा अभिनय, राहुल बोसची विनोदी शैली आणि काही मजेशीर प्रसंग यामुळे चित्रपट पाहण्याजोगा आहे.
एकूणच, ‘उड़ता तीर’ हा देशभक्ती, गुप्तहेरगिरी आणि विनोद यांचा संगम असलेला हलकाफुलका चित्रपट आहे. कथेत काही ठिकाणी गती कमी होते आणि गाणीही फारशी प्रभावी नाहीत. तरीही, कलाकारांचा अभिनय आणि विनोदी प्रसंग चित्रपटाला मनोरंजक बनवतात.
तुम्हाला गंभीर कथानकापेक्षा हलकेफुलके मनोरंजन आवडत असेल, तर हा चित्रपट पाहण्याचा विचार करू शकता. मात्र, ससपेन्स, थरार किंवा अतिशय वेगवान कथा अपेक्षित असेल, तर तुमचा अपेक्षाभंग होऊ शकतो.
RATING: ⭐ ⭐ ⭐
