Cockroach Janata Party Celebrities: सोशल मीडियावर गेल्या काही दिवसांपासून प्रचंड चर्चेत असलेली ‘कॉकरोच जनता पार्टी’ (CJP) आता फक्त मीम्सपुरती मर्यादित राहिलेली नाही. तरुणांमध्ये लोकप्रिय ठरलेल्या या मोहिमेला आता बॉलिवूड आणि सोशल मीडिया सेलिब्रिटींचाही प्रतिसाद मिळू लागला आहे.
‘कॉकरोच जनता पार्टी’ची सुरुवात सोशल मीडियावर व्यंगात्मक पद्धतीने झाली. बेरोजगारी, पेपरफुटी, भ्रष्टाचार आणि राजकीय गोंधळ यांसारख्या मुद्द्यांवर तरुणांमधील नाराजी मीम्स आणि विनोदी पोस्ट्सच्या माध्यमातून व्यक्त करण्यासाठी हा ट्रेंड पुढे आला.
पारंपरिक राजकीय पक्षांसारखी रचना नसून, ही एक इंटरनेट-आधारित व्यंगात्मक डिजिटल चळवळ मानली जात आहे. काही दिवसांतच Instagram, X आणि Reels वर हा ट्रेंड मोठ्या प्रमाणात व्हायरल झाला.
या ट्रेंडमध्ये अनेक प्रसिद्ध चेहरे जोडले गेल्याची चर्चा सोशल मीडियावर सुरू आहे. दिग्दर्शक अनुराग कश्यप, अभिनेत्री ईशा गुप्ता, कोंकणा सेन शर्मा, फातिमा सना शेख यांसारख्या बॉलिवूड कलाकारांची नावं चर्चेत आहेत.
तसंच सोशल मीडिया आणि टीव्ही क्षेत्रातील उर्फी जावेद, उमर रियाझ, अभिषेक निगम, नग्मा मिराजकर, पुरव झा आणि गायिका हिमांशी खुराना यांनीही या पार्टीला सपोर्ट केला आहे.
या मोहिमेची सुरुवात अभिजीत दिपके यांनी केली आहे. ते राजकीय संवाद आणि डिजिटल मोहिमांमध्ये काम करणारे रणनीतीकार म्हणून ओळखले जातात. तरुणांच्या असंतोषाला व्यंगात्मक आणि डिजिटल भाषेत मांडण्याचा हा प्रयत्न असल्याचं मानलं जात आहे.
‘कॉकरोच जनता पार्टी’च्या लोकप्रियतेमागे तिची मीम-फ्रेंडली शैली हे मोठं कारण मानलं जात आहे. गंभीर राजकीय भाषणांपेक्षा विनोद, टोलेबाजी आणि रिलेटेबल कंटेंटच्या माध्यमातून तरुणांचा रोष व्यक्त केला जात असल्याने ही मोहीम वेगाने पसरली. सध्या ही चळवळ फक्त इंटरनेट ट्रेंड राहते की पुढे आणखी मोठं रूप घेते, याकडे सर्वांचं लक्ष लागलं आहे.