पुढारी ऑनलाईन डेस्क
अभिनेत्री मोनालिसा बागल (Monalisa Bagal) आगामी का रं देवा या चित्रपटात झळकणार आहे. एक आदर्शमय प्रेमकथा असलेल्या या चित्रपटाचं टीजर पोस्टर लाँच करण्यात आलं आहे. आगामी का रं देवा पोस्टर यामुळे चित्रपटाविषयी उत्सुकता निर्माण झाली आहे. येत्या ११ फेब्रुवारीला हा चित्रपट प्रदर्शित होणार आहे.
सह्याद्री फिल्म प्रोडक्शनच्या प्रशांत शिंगटे यांनी चित्रपटाची निर्मिती केली आहे. चित्रपटाची कथा आणि दिग्दर्शन रंजीत दशरथ जाधव यांचं आहे. सुशांत माने, तानसेन लोकरे यांची गीतं संदीप भुरे यांनी संगीतबद्ध केली आहेत. सुप्रसिद्ध गायक आनंद शिंदे, आदर्श शिंदे, मधुर शिंदे, डॉ.नेहा राजपाल, सुप्रिया सोरटे यांनी गाणी स्वरबद्ध केली आहेत.
या अभिनेत्रीने "झाला बोभाटा" या चित्रपटातून आपली छाप उमटवली होती. त्याशिवाय करंट, रावरंभा आणि भिरकीट अशा उत्तमोत्तम आगामी चित्रपटातही ती महत्त्वपूर्ण भूमिकांमध्ये दिसणार आहे.
या चित्रपटात नायक कोण असणार ? हे अजून गुलदस्त्यात ठेवण्यात आलं आहे. अभिनेते अरुण नलावडे, नागेश भोसले आणि जयवंत वाडकर अशी दिग्गज कलाकार मंडळी या चित्रपटात आपल्याला पहायला मिळणार आहेत.
एकमेकांच्या अतिशय जवळ उभे असलेले दोघं आणि एक आदर्शमय प्रेमकथा ही टॅगलाईन पोस्टरवर दिसत आहे. तसंच वेगवेगळ्या रंगांच्या वापरामुळे प्रेमाच्या नात्यातले विविध रंगही पोस्टरवर उतरले आहेत. त्यामुळे या प्रेमकथेत काय पहायला मिळणार याचं कुतुहल निर्माण झालं आहे.