पुढारी ऑनलाईन डेस्क : विराट कोहलीच्या 113 धावांच्या नाबाद खेळीच्या जोरावर रॉयल चॅलेंजर्स बंगळुरूने (आरसीबी) राजस्थान रॉयल्ससमोर 184 धावांचे लक्ष्य ठेवले. राजस्थानचा कर्णधार संजू सॅमसनने नाणेफेक जिंकून प्रथम गोलंदाजी करण्याचा निर्णय घेतला, पण कोहली आणि फाफ डुप्लेसिसने पहिल्या विकेटसाठी शानदार शतकी भागीदारी करून सॅमसनचा निर्णय चुकीचा सिद्ध केला. या दोन फलंदाजांच्या उत्कृष्ट खेळीच्या जोरावर आरसीबीने 20 षटकांत 3 बाद 183 धावा केल्या. राजस्थानसाठी फिरकी गोलंदाज युजवेंद्र चहलने चार षटकांत ३४ धावा देत दोन बळी घेतले आणि तो संघाचा सर्वात यशस्वी गोलंदाज ठरला.
विराट कोहली आणि कर्णधार फाफ डुप्लेसिसने आरसीबीला राजस्थान रॉयल्सविरुद्ध दमदार सुरुवात केल्याने सॅमसनचा निर्णय उलटला. पहिल्या विकेटसाठी पॉवरप्ले संपेपर्यंत दोन्ही फलंदाजांनी अर्धशतकी भागीदारी पूर्ण केली. सहा षटके संपल्यानंतर आरसीबीने एकही विकेट न गमावता 53 धावा केल्या होत्या. पॉवरप्ले दरम्यान आरसीबीने एकही विकेट गमावली नसल्याची या मोसमातील ही पहिलीच वेळ आहे. त्याचवेळी विराट कोहली पॉवरप्लेमध्ये या मोसमात सर्वाधिक धावा करणारा खेळाडू ठरला. या कालावधीत कोहलीने आतापर्यंत 121 धावा केल्या. कोहली आणि डुप्लेसिस यांनी आयपीएलमध्ये पाचव्यांदा शतकी भागीदारी केली आणि आयपीएलमध्ये सर्वाधिक शतकी भागीदारी करणारी संयुक्त दुसरी जोडी बनली.
विराट कोहलीने राजस्थानविरुद्ध आपला उत्कृष्ट फॉर्म राखत यंदाच्या हंगामातील पहिले शतक झळकावले. या मोसमात शतक झळकावणारा कोहली पहिला खेळाडू ठरला आहे. कोहलीचे आयपीएल कारकिर्दीतील हे आठवे शतक आहे. कोहलीने 67 चेंडूत आपले शतक पूर्ण केले. मात्र, आरसीबीचा कर्णधार फाफ डुप्लेसिसचे राजस्थान रॉयल्सविरुद्धचे अर्धशतक हुकले.
राजस्थानचा फिरकी गोलंदाज युजवेंद्र चहलने संघाला पहिले यश मिळवून दिले. डुप्लेसिस 33 चेंडूत 44 धावा करून बाद झाला. यासह कोहली आणि डुप्लेसिस यांच्यातील पहिल्या विकेटसाठी 125 धावांची भागीदारी तुटली. आयपीएलमधील आरसीबीसाठी ही 47 वी शतकी भागीदारी होती जी चहलने फोडली. यानंतर नांद्रे बर्जरने राजस्थान रॉयल्सला दुसरे यश मिळवून दिले. ग्लेन मॅक्सवेल तीन चेंडूत एक धाव काढून पॅव्हेलियनमध्ये परतला. यानंतर चहलने पुन्हा एकदा आपल्या शानदार गोलंदाजीचे प्रदर्शन करत पदार्पण सामना खेळत असलेल्या सौरव चौहानला नऊ धावांच्या स्कोअरवर बाद केले. मात्र, दुसऱ्या टोकापासून कोहली खंबीरपणे उभा राहिला आणि शानदार शतक झळकावून नाबाद पॅव्हेलियनमध्ये परतला. कोहलीने 72 चेंडूंच्या खेळीत 12 चौकार आणि चार षटकार मारले.
आरसीबीचा स्टार फलंदाज विराट कोहलीने राजस्थान रॉयल्सविरुद्ध खेळल्या जाणाऱ्या सामन्यादरम्यान या स्पर्धेत 7500 धावा पूर्ण केल्या आहेत. 34 धावा करून ही कामगिरी करणारा कोहली पहिला फलंदाज ठरला आहे. कोहली सध्या 32 चेंडूत 38 धावा केल्यानंतर खेळत आहे. त्याच्यासोबत फाफ डुप्लेसिस 22 चेंडूत 34 धावा करून क्रीजवर उपस्थित आहे.
हेही वाचा :