मोगादिशू, सोमालिया; पुढारी ऑनलाईन; सोमालियातील (Somalia) जुब्बा एअरवेजचे विमान कोसळून अपघात झाला. पण त्यातील ३६ प्रवाशी आश्चर्यकारकरित्या बचावले आहेत. विमानतळावर कोसळलेले हे विमान उलट्या स्थितीत येऊन थांबले. ही घटना सोमालियातील मोगादिशू विमानतळावर (Mogadishu airport) सोमवारी घडली. याबाबत माहिती देताना सोमालियातील अधिकाऱ्यांनी सांगितले की, जे विमान दुर्घटनाग्रस्त झाले आहे त्यात ३६ प्रवासी आणि कर्मचारी होते. हे विमान सोमवारी मोगादिशू विमानतळावर कोसळले. पण विमानातील सर्वजण बचावले.
जुब्बा एअरवेजचे विमान बैदोआ येथून स्थानिक प्रवाशांना घेऊन मोगादिशूकडे आले होते. पण सोमवारी मोगादिशूमधील एडन आंतरराष्ट्रीय विमानतळावर लँड करताना ते क्रॅश झाले. याबाबत सोमालियाच्या नागरी उड्डाण वाहतूक विभागाचे संचालक अहमद मोअलीम यांनी सांगितले की, विमान विमानतळावर उतरत असताना स्थानिक वेळेनुसार सकाळी ११ च्या सुमारास दुर्घटनाग्रस्त झाले. प्रत्यक्षदर्शींच्या म्हणण्यानुसार, विमान धावपट्टीवर पोहोचण्यापूर्वी खाली आले आणि उलट्या स्थितीत येऊन थांबले. विमानतळावर कोसळताच विमानाला आग लागली. त्यानंतर लगेच अग्निशामक दलाने आग विझवण्यासाठी धाव घेतली.
विमानाचा अपघात आणि आग लागूनही विमानातील ३६ लोकांपैकी फक्त तिघे जण किरकोळ जखमी झाले. विमानतळाच्या धावपट्टीजवळ हे एक विमान उलट्या स्थितीत येऊन कोसळले. सुदैवाने यात कोणतीही जीवितहानी झाली नाही आणि विमानातील सर्व प्रवासी बचावले, अशी माहिती नागरी उड्डाण वाहतूक विभागाकडून देण्यात आली आहे.