पिंपळे गुरव : वाकड कस्पटेवस्ती येथील नंदादीप सोसायटीजवळ महावितरणअंतर्गत केबल जॉईंट मारण्याचे काम करण्यात आले होते. हे काम पूर्ण होऊन तब्बल दोन ते तीन महिने उलटले असतानाही संबंधित एजन्सीने खोदलेला खड्डा अद्याप बुजवलेला नाही. तसेच, खोदकामातून निघालेली माती दगड व राडारोडा पदपथावर व रस्त्याच्याकडेला तसाच पडून असल्याने परिसरातील नागरिकांना मोठ्या अडचणींचा सामना करावा लागत आहे.
सदर रस्ता हा वाहतुकीच्यादृष्टीने अत्यंत वर्दळीचा असून, दुचाकी व चारचाकी वाहनांची सतत ये-जा सुरू असते. अशा परिस्थितीत खुला खड्डा व आजूबाजूला पसरलेली माती-दगड यामुळे अपघाताचा धोका मोठ्या प्रमाणात वाढला आहे. विशेषतः ज्येष्ठ नागरिक, महिला व लहान मुलांसाठी ही परिस्थिती अत्यंत धोकादायक ठरत आहे.
नंदादीप सोसायटीच्या शेजारीच हॉटेल्स व दुकाने असल्यामुळे तेथे येणाऱ्या ग्राहकांना तसेच सोसायटी धारकांना या अस्वच्छता व अडथळ्यांचा त्रास सहन करावा लागत आहे. पदपथ वापरणे कठीण झाल्याने नागरिकांना थेट रस्त्यावरून चालावे लागत असून, त्यामुळे वाहतुकीत अडथळे निर्माण होऊन अपघाताची शक्यता वाढली आहे.
या भागातील नागरिक व स्थानिक रहिवाशांनी संबंधित विभागाने तात्काळ दखल घेऊन खोदलेला खड्डा योग्य पद्धतीने बुजवावा. तसेच, परिसरातील माती, दगड व राडारोडा त्वरित उचलण्यात यावा, अशी मागणी केली आहे. प्रशासनाने या गंभीर बाबीकडे दुर्लक्ष न करता त्वरित कारवाई करावी, अशी अपेक्षा नागरिकांकडून व्यक्त होत आहे.
तीन महिने होऊन गेले तरी खड्डा तसाच आहे. दररोज शाळकरी मुले आणि ज्येष्ठ नागरिक या रस्त्यावरून ये-जा करतात. एखादा मोठा अपघात झाल्यावरच प्रशासन जागे होणार का? =स्थानिक नागरिक
वायरिंगचा जॉईंट दुरुस्त करून दोन-तीन महिने झाले आहेत. काम पूर्ण झाल्यानंतर संबंधित एजन्सीला खड्डा बुजवण्यास सांगितले होते. आज दिवसभरात एजन्सीला पुन्हा सूचना देऊन ते काम पूर्ण करून घेतले जाईल.सुरेश गवारी, सहायक अभियंता, वाकड विभाग, महावितरण