वडगाव मावळ: पुणे विभाग पदविधर व शिक्षक मतदारसंघ निवडणुकीच्या पार्श्वभूमीवर नूतन महाराष्ट्र विद्या प्रसारक मंडळ तसेच इंद्रायणी महाविद्यालय संस्थेतर्गत येणाऱ्या सर्व शाळा, महाविद्यालये व शैक्षणिक संस्थांतील पदवीधर आणि शिक्षक मतदारांच्या आज झालेल्या बैठकीत पदवीधर उमेदवार डॉ. स्मिता योगेश जाधव व शिक्षक उमेदवार कौस्तुभ गावडे यांना भरघोस मतांनी विजयी करण्याचा निर्धार करण्यात आला.
वडगाव मावळ येथील श्रीकृष्ण हॉलमध्ये ठाणे शहराचे आमदार संजय केळकर आणि माजी राज्यमंत्री संजय (बाळा) भेगडे यांच्या प्रमुख उपस्थितीत ही बैठक झाली. या वेळी पदवीधर व शिक्षक निवडणुकीचे मावळ प्रभारी तथा भाजपचे उत्तर रायगड जिल्हाध्यक्ष अविनाश कोळी, प्रदेश किसान मोर्चाचे माजी अध्यक्ष गणेश भेगडे, उद्योजक रामदास काकडे, मावळ भाजपा प्रभारी गुलाबराव म्हाळस्कर, अंदर मावळ मंडल अध्यक्ष अभिमन्यू शिंदे, उत्तर रायगड सोशल मीडिया संयोजक व प्रभारी सुशील शर्मा, सागर शिंदे आणि गणेश ठोंबरे यांच्यासह भारतीय जनता पार्टीचे पदाधिकारी, शिक्षक व पदवीधर मतदार उपस्थित होते.
या बैठकीत उपस्थित मान्यवरांनी पदवीधर व शिक्षक मतदारांशी संवाद साधत निवडणुकीच्या अनुषंगाने विचारविनिमय केला. शिक्षक आणि पदवीधर मतदारसंघाच्या निवडणुकीत महायुतीच्या उमेदवारांना पाठिंबा देऊन त्यांना विजयी करण्यासाठी सर्वांनी प्रयत्न करावेत, असे आवाहन या वेळी करण्यात आले.
मतदारांशी थेट संवाद साधत निवडणुकीच्या पार्श्वभूमीवर महायुतीच्या उमेदवारांच्या प्रचाराला बळ देण्याचा प्रयत्न या बैठकीच्या माध्यमातून करण्यात आला. सूत्रसंचालन भारत काळे यांनी केले. दरम्यान, तळेगाव दाभाडे येथील बालविकास विद्यालय, आदर्श विद्या मंदिर या शाळांमध्ये बैठक घेण्यात आली.