पिंपरी: पिंपरी-चिंचवड महापालिकेच्या आगामी निवडणुकीसाठी प्रसिद्ध करण्यात आलेल्या प्रारूप प्रभाग रचनेवरील प्राप्त हरकतींवर सुनावणी पूर्ण झाली आहे. त्यानंतर शासनाने नियुक्त केलेल्या प्राधिकृत अधिकाऱ्यांसोबत शहरातील सत्ताधारी पक्षाच्या एका आमदाराने मोहननगर, चिंचवड येथील पंचतारांकित हॉटेलमध्ये स्वतंत्र मीटिंग घेऊन गुप्त चर्चा केली. त्यामुळे महापालिकेचे प्रभागरचनेचे नकाशे बदलण्यात येतील, अशी चर्चा शहरभर रंगली आहे.
प्रभागरचनेच्या बदलासाठी मोठ्या संख्येने हरकती दाखल
महापालिकेने 22 ऑगस्टला चार सदस्यीय पद्धतीने 32 प्रभागांची प्रारुप रचना जाहीर करून नकाशे प्रसिद्ध केले. त्यानंतर या प्रभाग रचनेवर आलेल्या 318 हरकतींवर बुधवारी (दि. 10) चिंचवड येथील ऑटो क्लस्टर सभागृहात एकाच दिवशी राज्याचे सहकार आणि विपणन विभागाचे प्रधान सचिव प्रवीण दराडे यांनी सुनावणी घेतली. (Latest Pimpri News)
महापालिकेची आगामी निवडणूक ही सन 2017 च्या प्रभागरचनेप्रमाणेच होणार आहे. ही रचना भाजपच्या मर्जीप्रमाणेच आणि भौगोलिक सलगता, मोठे रस्ते, प्रभागाची कशाही पध्दतीने मोडतोड केल्याचा आरोप राष्ट्रवादी काँग्रेस (अजित पवार) पक्षाच्या पदाधिकाऱ्यांनी वारंवार केला आहे.
त्यामुळेच सन 2017 मध्ये भाजपचे 3 नगरसेवकांवरून 77 नगरसेवक निवडून येऊन एकहाती सत्ता मिळविली. आगामी निवडणुकीसाठी सन 2017 चीच प्रभागरचना कायम रहावी, यासाठी भाजप आमदार व पदाधिकाऱ्यांचे प्रयत्न सुरू असल्याची चर्चा आहे. महायुतीमधील राष्ट्रवादी काँग्रेस (अजित पवार) प्रभाग रचनेत बदल केला जावा, यासाठी मोठ्या संख्येने हरकती दाखल केल्या आहेत.
सुनावणी प्रक्रिया पूर्ण झाल्यानंतर प्राधिकृत अधिकाऱ्यासह महापालिकेचे वरिष्ठ अधिकारी आणि सत्ताधारी पक्षातील एका आमदाराने चिंचवड येथील एका पंचताराकिंत हॉटेलमध्ये मीटिंग घेत चर्चा केली, अशी माहिती सूत्रांनी दिली. त्यामुळे सत्ताधारी निवडणुका जिंकण्यासाठी सत्ताधाऱ्यांकडून नियमबाह्यपणे प्रयत्न केले जात असल्याची चर्चा आहे. निवडणूक प्रक्रियेतील वरिष्ठ अधिकारी सत्ताधार्यांच्या सोबत असल्याप्रमाणे काम करत असल्याची टीका विरोधकांकडून होऊ लागली आहे. त्यामुळे महापालिकेची प्रभाग रचना फुटणार, अशी चर्चा रंगली आहे.