पिंपरी: प्रवासी वाहतुकीचा परवाना असताना रिक्षा आणि दुचाकींचा वापर मालवाहतुकीसाठी करणाऱ्या वाहनचालकांना पिंपरी-चिंचवड प्रादेशिक परिवहन कार्यालयाने (आरटीओ) दणका दिला आहे. ऑनलाइनच्या माध्यमातून सुरू असलेल्या या अनधिकृत वाहतुकीविरोधात आरटीओने विशेष तपासणी मोहीम राबविली.
यामध्ये नियमांचे उल्लंघन करणाऱ्या १८ वाहनांवर कारवाई करण्यात आली. त्यांच्याकडून २ लाख १५ हजार रुपयांचा दंड वसूल करण्यात आला. या प्रकरणी संबंधित ऑनलाइन सेवा पुरवठादार कंपन्यांनाही नोटिसा बजावण्यात आल्या आहेत. शहरात ऑनलाइनच्या माध्यमातून मालाची घरपोच वाहतूक करण्याचे प्रमाण वाढत आहे.
यासाठी काही ठिकाणी प्रवासी रिक्षा आणि दुचाकींचा वापर केला जात असल्याचे आरटीओच्या निदर्शनास आले. ऑनलाईन कंपन्यांच्या माध्यमातून अशा प्रकारची वाहतूक होत असल्याची बाब समोर आल्यानंतर परिवहन विभागाने तपासणीचा निर्णय घेतला. आरटीओच्या पथकाने शहरातील विविध भागांत तपासणी मोहीम राबविली.
या वेळी वाहनांचे परवाने आणि त्यांचा प्रत्यक्ष वापर यांची पडताळणी करण्यात आली. प्रवासी वाहतुकीसाठी नोंदणी असलेल्या वाहनांचा मालवाहतुकीसाठी वापर होत असल्याचे आढळलेल्या १८ वाहनांवर कारवाई करण्यात आली. या कारवाईत एकूण २ लाख १५ हजार रुपयांचा दंड वसूल करण्यात आला.
चार ऑनलाइन कंपन्यांना नोटिसा या प्रकरणात आरटीओने केवळ वाहनचालकांपुरती कारवाई मर्यादित ठेवलेली नाही. मालवाहतुकीसाठी प्रवासी वाहनांचा वापर होत असल्याचा पार्श्वभूमीवर चारही ऑनलाइन कंपन्यांना नोटिसा बजावण्यात आल्या आहेत. संबंधित कंपन्यांकडून लेखी खुलासा मागविण्यात आला आहे. नियमांचे उल्लंघन करणाऱ्या वाहनचालकांवर यापुढेही कठोर कारवाई केली जाणार आहे.