पिंपरी: दुचाकी चोरल्यानंतर त्यांचे स्पेअर पार्ट वेगळे करून भंगारात विकणाऱ्या टोळीचा बावधन पोलिसांनी पर्दाफाश केला आहे. याप्रकरणी दोन सराईत आरोपींसह एका अल्पवयीन मुलाला ताब्यात घेण्यात आले असून, त्यांच्याकडून पाच दुचाकी आणि विविध वाहनांचे स्पेअर पार्ट असा दोन लाख ६५ हजार रुपयांचा मुद्देमाल जप्त करण्यात आला आहे.
पवन मरिअप्पा भज्जी (वय २५, रा. औंध) आणि ऋषिकेश शहाजी साठे (वय २९, रा. पिंपळे निलख) अशी आरोपींची नावे आहेत. त्यांच्यासोबत एका अल्पवयीन मुलालाही ताब्यात घेण्यात आले आहे. आरोपींविरुद्ध वाकड पोलिस ठाण्यात यापूर्वीही विविध गुन्हे दाखल असल्याचे पोलिसांनी सांगितले.
पोलिसांनी दिलेल्या माहितीनुसार, बाणेर येथील रोहन लेहर सोसायटी परिसरातून यामाहा एमटी-१५ (एमएच १३ ईडब्ल्यू ५८४७) ही दुचाकी चोरीला गेली होती. या प्रकरणाचा तपास करताना पोलिसांनी परिसरातील सुमारे ९० ते १०० सीसीटीव्ही कॅमेऱ्यांचे फुटेज तपासले. त्यामध्ये संशयित चोरीची दुचाकी घेऊन पिंपळे निलख येथील इंगवले चौकाच्या दिशेने गेल्याचे निष्पन्न झाले.
त्यानुसार, पोलिसांनी इंगवले चौकातील हॉटेल जगदंबाच्या मागील परिसरात शोध घेतला. तेथे आरोपी ऋषिकेश साठे याचे फॅब्रिकेशनचे दुकान असल्याचे समोर आले. चोरीच्या दुचाकी या दुकानात आणून त्यांचे स्पेअर पार्ट वेगळे केले जात होते. त्यानंतर हे पार्ट भंगारात विकले जात असल्याचे तपासात निष्पन्न झाल्याचे पोलिसांनी सांगितले. पोलिसांनी दुकानातून चोरीच्या दुचाकी आणि विविध वाहनांचे स्पेअर पार्ट जप्त केले.
ही कारवाई वरिष्ठ पोलिस निरीक्षक अरविंद पवार यांच्या मार्गदर्शनाखाली पोलिस उपनिरीक्षक सारंग ठाकरे, पोलिस अंमलदार स्वप्निल साबळे आणि अक्षय लाटे यांच्या पथकाने केली. या घटनेचा पुढील तपास बावधन पोलिस करीत आहेत.