पिंपरी : पिंपरी-चिंचवड महापालिका सार्वत्रिक निवडणुकीची 16 जानेवारीला मतमोजणी होणार आहे. महापालिकेच्या निवडणूक यंत्रणेकडून मतमोजणी कक्षाच्या तयारी सुरू करण्यात आली आहे. मतमोजणीसाठी नियुक्त करण्यात आलेला प्रशिक्षण कक्ष, मतमोजणी कक्षांची मांडणी, सीसीटीव्ही नियंत्रण कक्ष तसेच, संपूर्ण मतमोजणी प्रक्रियेवर देखरेख ठेवण्यासाठी यंत्रणा उभारण्यात आली आहे.
त्या तयारीचा आढावा मुख्य निवडणूक निरीक्षक निरंजन कुमार सुधांशू, निवडणूक निरीक्षक सरिता नरके घेतला. त्यासंदर्भात आवश्यक त्या सूचना संबंधित निवडणूक निर्णय अधिकाऱ्यांना दिल्या.
या वेळी आयुक्त तथा निवडणूक अधिकारी श्रावण हर्डीकर, निवडणूक निर्णय अधिकारी अनिल पवार, मुख्य अभियंता तथा मुख्य निवडणूक निरीक्षक यांचे समन्वय अधिकारी संजय कुलकर्णी, कार्यकारी अभियंता तथा समन्वय अधिकारी हरविंदरसिंह बन्सल, सहाय्यक निवडणूक निर्णय अधिकारी सुनिल शिंदे, विद्युत विभागाचे कार्यकारी अभियंता सचिन नगरे व कर्मचारी उपस्थित होते.
निवडणूक निर्णय अधिकारी अनिल पवार यांनी मतमोजणी प्रक्रियेच्या अनुषंगाने सुरू असलेल्या विविध तयारीबाबत माहिती दिली.
स्ट्रॉंग रूमची रचना, तेथे ठेवण्यात आलेली ईव्हीएम यंत्रे, परिसरातील सुरक्षा व्यवस्था, पोलिस बंदोबस्त, सीसीटीव्ही निरीक्षण व्यवस्था यांचा आढावा निरंजन कुमार सुधांशू यांनी घेतला. मतमोजणीच्या दिवशी राबविण्यात येणाऱ्या प्रक्रियेचा आराखडा, मतमोजणी टेबलांची संख्या, अधिकारी व कर्मचारी नेमणूक, प्रवेश व निर्गमन मार्ग, माध्यम प्रतिनिधी व उमेदवार प्रतिनिधींसाठी करण्यात आलेली व्यवस्था याबाबतची माहिती देण्यात आली.
मुख्य निवडणूक निरीक्षक निरंजन कुमार सुधांशू, निवडणूक निरीक्षक सरिता नरके यांनी मतमोजणी प्रक्रियेच्या तयारीचा आढावा घेतला.