पिंपरी: पिंपरी-चिंचवड महापालिका निवडणुकीसाठी जाहिर प्रचार बंदी मतदान समाप्तीच्या 48 तास अगोदर असणार आहे. निवडणुकीसाठी जाहीर प्रचाराचा कालावधी मंगळवार (दि. 13) सायंकाळी 5.30 ला समाप्त होणार आहे. त्यानंतर प्रचार थंडावणार आहे.
प्रचाराचा कालावधी संपल्यानंतर इलेक्ट्रॉनिक मिडीयाद्वारे तसेच, प्रिंट मिडीयाद्वारे देखील प्रचारावर बंदी राहील. यामध्ये मेसेजिंग ॲप तसेच, व्हॉट्स ॲप, फेसबुक, ट्विटर आदी सोशल मीडियाचाही समावेश आहे.
जाहीर प्रचाराचा कालावधी संपल्यानंतर प्रचाराचे साहित्य संबंधित उमेदवार किंवा पक्षांनी तात्काळ काढून टाकणे आवश्यक राहील. संबंधितांनी असे प्रचार साहित्य जाहीर प्रचाराचा कालावधी संपल्यानंतर न काढल्यास, त्याबाबत मालमत्ता विद्रुपीकरण कायद्यानुसार गुन्हा दाखल केला जाईल.
प्रचार साहित्य काढण्याकरिता आलेल्या खर्चाचा समावेश संबंधित उमेदवारांच्या खर्चामध्ये समाविष्ट करण्यात येणार आहे. प्रचाराचा कालावधी संपल्यानंतर कोणत्याही पध्दतीचा प्रचार इलेक्ट्रॉनिक व प्रिंट मिडीयाद्वारे करू नये.
जाहीर प्रचाराचा कालावधी संपल्यानंतर सर्व संबंधित राजकीय पक्ष व उमेदवार यांनी प्रचाराशी संबंधित सर्व साहित्य तात्काळ काढून टाकावे, असे आवाहन आचारसंहिता कक्षप्रमुख सुरेखा माने यांनी केले आहे.