पिंपरी: नॅशनल कॉमन मोबिलिटी कार्ड (एनसीएमसी) नोंदणीसाठी प्रवाशांची आर्थिक लूट करणाऱ्या एजंटवर एसटी महामंडळ प्रशासनाने कारवाई करत कार्ड जप्त केले. त्यानंतर हे कार्ड कोठे मिळतील, याची माहिती फलक लावलाच नाही. त्यामुळे प्रवाशांना महात्मा फुलेनगर ते वल्लभनगर आगार अशी पायपीट करावी लागत आहे.
एनसीएमसी कार्ड वितरण करण्यासाठी मे. ईबिक्स टेक्नॉलॉजिस लि. कंपनीमार्फत वल्लभनगर आगारात अधिकृत एजंटची नियुक्ती केली होती. कार्डची किंमत १९९ रुपये असताना सदर एजंट नागरिकांकडून ३०० रुपये उकळत होता.
त्यानंतर पुन्हा एजंटकडून प्रवाशांना महात्मा फुलेनगर परिसरात बोलावून कार्ड ॲक्टिव्हेशनच्या नावाखाली प्रत्येकी १०० रुपये उकळत होता. तक्रारी वाढल्याने वल्लभनगर आगार व्यवस्थापकांनी कारवाई करत एजंटकडील सर्व कार्ड जप्त केले. त्यानंतर पर्यायी व्यवस्थेची माहिती देणारे फलक लावले नाहीत. त्यामुळे ज्येष्ठ नागरिकांना आणि महिलांना जुन्या केंद्रावर चकरा मारुन पुन्हा दीड किलोमीटर पायपीट करत वल्लभनगर येथील आगारात यावे लागत आहे.
आगारात प्रमुखांच्या केबिनबाहेर नवीन कार्डसाठी काही एजंटचे मोबाईल क्रमांक प्रसिध्द करण्यात आले आहेत. त्यावर संपर्क साधला असता ते प्रवाशांना आगाराबाहेर बोलावत आहेत. त्यामुळे प्रशासनाने एजंटचे नंबर प्रसिध्द केलेच कसे, असा प्रश्न नागरिकांतून उपस्थित केला जात आहे.