लोणावळा : शहरात मागील चार ते पाच दिवसांपासून सुरू असलेल्या संततधार पावसामुळे येथील प्रसिद्ध असलेले भुशी धरण ओव्हरफ्लो झाले आहे. आज (दि.3 जुलै) सकाळी धरणाच्या पायऱ्यांवरून पाणी वाहण्यास सुरुवात झाली. मागील 24 तासात लोणावळा शहरात 116 मिमी पाऊस झाला आहे.
लोणावळा खंडाळा तसेच भुशी धरणाच्या वरील बाजूला असलेल्या डोंगर भागात पाऊस सुरू आहे. काल (दि.2 जुलै) तीन ते चार फूट खाली असलेले धरण सकाळपर्यंत पूर्ण क्षमतेने भरले असून धरणाच्या भिंतीवरून पायऱ्यांवर पाणी येऊ लागले आहे. त्यामुळे उद्याच्या शनिवार व रविवारी लोणावळ्यात वर्षाविहारासाठी पर्यटकांची मोठी गर्दी होण्याची शक्यता आहे.
धरण परिसरात पर्यटकांनी सुरक्षिततेचे नियम पाळावेत, तसेच पायऱ्यांवरून पाणी वाहत असताना अतिउत्साहात काहीही करू नये, असे सूचित करण्यात आले आहे. भुशी धरणाचे हे विलोभनीय रूप पाहण्यासाठी आणि पावसाळी पर्यटन अनुभवण्यासाठी पर्यटकांची लगबग वाढणार असून, यामुळे स्थानिक व्यवसायांनाही मोठी चालना मिळणार आहे. मागील काही दिवसांच्या पावसाने लोणावळ्यातील जलस्त्रोत पूर्णपणे भरले असून, निसर्गाचे सौंदर्य अधिकच खुलून दिसू लागले आहे.