Contaminated Water: पिंपरीसह उपनगरांत दूषित पाणीपुरवठा; नागरिकांच्या आरोग्याचा प्रश्न गंभीर

खराळवाडी: पिंपरी शहरासह खराळवाडी, लालटोपीनगर संत तुकारामनगर, मासुळकर कॉलनी, मोरवाडी, अजमेरा, म्हाडा कॉलनी, पिंपरी, भाजीमंडई या परिसरात मागील दहा दिवसांपासून दूषित पाणीपुरवठा होत आहे.

याकडे महापालिकेचा पाणीपुरवठा विभाग दुर्लक्ष करत आहे. दूषित, दुर्गंधीयुक्त पाण्यामुळे नागरिकांचे आरोग्य धोक्यात आले आहे. तरी महापालिका प्रशासनाने शहराला शुद्ध आणि पुरेसा पाणीपुरवठा करावा, अशी मागणी नागरिकांकडून करण्यात येत आहे. (Latest Pimpri News)

पावसाच्या तोंडावर आता पिंपरी शहरात अतिशय दूषित व दुर्गंधीयुक्त पाणीपुरवठा होत असल्याबाबत नागरिकांच्या तक्रारी वाढल्या आहेत. दूषित पाण्यामुळे नागरिकांचे आरोग्य धोक्यात आले आहे.

याबाबत तातडीने महापालिका पाणीपुरवठा विभागाने लक्ष द्यावे. दुर्गंधीयुक्त आणि दूषित पाण्यामुळे रमाबाईनगर, भीमनगर, गांधीनगर, नेहरूनगर, खराळवाडी, यशवंतनगर, अजमेरा परिसरात सर्दी, खोकला, थंडीताप, पोटदुखी, उलटी, अतिसार यासारखे आजाराने डोके वर काढले आहे. उपचारासाठी नागरिक जवळच्या खासगी व महापालिकेच्या यशवंतराव चव्हाण रुग्णालयात गर्दी करताना दिसून येत आहेत.

पाण्याला येतोय उग्र वास

खराळवाडी, पिंपरी परिसर, मासूळकर कॉलनी, नेहरुनगर आदी परिसरात महापालिकेकडून जो पाणीपुरवठा करण्यात येत आहे त्याला उग्र वास येत आहे. यामुळे पाणी पिऊ वाटत नाही. तसेच दूषित पाण्यामुळे लहान मुले, ज्येष्ठ नागरिक पोटाच्या विकाराने त्रस्त आहेत. महापालिका प्रशासनाने शुद्ध आणि सुरळीत पाणीपुरवठा करून नागरिकांचे पाण्यामुळे होणारे हाल थांबवावेत, अशी मागणी होत आहे.