Viral Video
इटावा: उत्तर प्रदेशातील इटावा जिल्ह्यातून एक संतापजनक प्रकार समोर आला आहे. एका प्राथमिक शाळेतील शिक्षकाला निलंबित करण्यात आले आहे. वर्गात एका मुलाच्या डोक्यावर 'तबला वाजवल्यासारखे' कृत्य करतानाचा त्यांचा व्हिडिओ सोशल मीडियावर व्हायरल झाल्यानंतर ही कारवाई करण्यात आली.
दिनेश कुमार माथूर असे या निलंबित शिक्षकाचे नाव आहे. विशेष म्हणजे, या शिक्षकानेच हे कृत्य स्वतःच्या मोबाईलमध्ये रेकॉर्ड करून नंतर आपल्या फेसबुक अकाऊंटवर अपलोड केले होते.
व्हायरल झालेल्या व्हिडिओमध्ये माथूर खुर्चीवर बसलेले दिसत आहेत, तर त्यांच्या समोर जमिनीवर एक मुलगा बसलेला आहे. माथूर अत्यंत विकृत आनंदात विद्यार्थ्याच्या डोक्यावर तबला वाजवल्यासारखी वारंवार थाप मारत असल्याचे आणि मोठ्याने हसत असल्याचे या व्हिडिओत स्पष्टपणे दिसून येत आहे. यावेळी आजूबाजूला बसलेली इतर मुलेही त्यात सामील झाली होती.
हा व्हिडिओ सोशल मीडियावर व्हायरल झाल्यानंतर तो इटावाच्या शिक्षण विभागाच्या अधिकाऱ्यांपर्यंत पोहोचला. या प्रकरणाची गंभीर दखल घेत शिक्षण अधिकारी डॉ. राजेश कुमार यांनी दिनेश कुमार माथूर याच्या वर्तणुकीला शिस्तभंग मानून तत्काळ प्रभावाने निलंबित केले.
सध्या शिक्षण विभागाकडून या संपूर्ण प्रकरणाची कसून चौकशी केली जात असून, चौकशीच्या अहवालात समोर येणाऱ्या निष्कर्षांनुसार या शिक्षकावर आणखी कठोर कायदेशीर कारवाई केली जाईल.