Tamil Nadu Election 2026: तामिळनाडूमध्ये मतमोजणी सुरू झाली आहे. आतापर्यंत विजय यांचा पक्ष तामिळगा वेत्री कळघम (TVK) १०३ जागांवर आघाडीवर आहे. डीएमके सध्या ५५ जागांवर आघाडीवर आहे. सुरुवातीच्या कलांनुसार, विजय थलपथी यांनी डीएमकेचा डाव उधळून लावला आहे. थलापती विजय तामिळनाडूत किंगमेकर ठरण्याची शक्यता आहे. त्यामुळे तो मुख्यमंत्री होतो का याची सध्या चर्चा सुरु आहे.
जोसेफ विजय चंद्रशेखर... विजय या नावाने ओळखला जाणारा हा अभिनेता २२ जून १९७४ रोजी चेन्नईत जन्मला. त्याचे वडील S.A. चंद्रशेखर हे चित्रपट दिग्दर्शक आणि आई शोभा चंद्रशेखर या पार्श्वगायिका आहेत. तामिळ सिनेमातील तो एक मोठा स्टार मानला जातो आणि चाहते त्याला प्रेमाने "थलापती" (सेनापती/नेता) म्हणून संबोधतात.
वयाच्या अवघ्या १० व्या वर्षी विजयने "वेत्री" (१९८४) या चित्रपटात बाल कलाकार म्हणून पदार्पण केले. १९९२ मध्ये नायक म्हणून "नालाया थीर्पू" या चित्रपटातून पदार्पण केले, मात्र तो बॉक्स ऑफिसवर अपयशी ठरला. त्यानंतर वडिलांनी त्याला लोकप्रिय अभिनेते विजयकांत यांच्यासोबत "सेंथूरपांडी" (१९९३) मध्ये संधी दिली, ज्यामुळे करिअरला नवी उभारी मिळाली. २००४ च्या "घिल्ली" या चित्रपटाने विजयला सुपरस्टार बनवले.
"थलाइवा" (२०१३), "थुपाक्की" (२०१२), "काठी" (२०१४), "मर्सल" (२०१७), आणि "बिगिल" (२०१९) यांसारख्या सामाजिक जाणिवेच्या भूमिकांमधून त्याने अँग्री यंग मॅनची इमेज तयार केली. २०१८ च्या "सरकार" या राजकीय चित्रपटात त्याने एका व्यापाऱ्याची भूमिका केली, यातच त्याच्या राजकीय महत्त्वाकांक्षेची चुणूक दिसत होती.
"जना नायगन" (जनतेचा नेता) हा त्याचा ६९वा आणि अखेरचा चित्रपट आहे, ज्यासाठी त्याला तब्बल ₹२७५ कोटी (सुमारे $३ कोटी डॉलर) मानधन मिळाले, भारतातील सर्वाधिक मानधन घेणाऱ्या अभिनेत्यांपैकी तो एक आहे.
२००९ मध्ये विजयने आपले फॅन क्लब "विजय मक्कल इयक्कम"ची (विजयची जनचळवळ) स्थापना केली, ज्यात तामिळनाडूभर सुमारे ८५,००० शाखा होत्या. २०११ च्या विधानसभा निवडणुकीत या संघटनेने AIADMK-नेतृत्वाखालील आघाडीला पाठिंबा दिला. नंतर २०२१ च्या स्थानिक स्वराज्य संस्था निवडणुकांमध्ये या संघटनेने १६९ पैकी तब्बल ११५ जागा जिंकल्या.
१९९४ मध्ये वडिलांनी त्याला "इलय थलापती" (तरुण सेनापती) म्हणून ओळख मिळवून दिली होती. काहींचे म्हणणे आहे की राजकीय प्रवास तेव्हाच सुरू झाला होता. २०१३ च्या "थलाइवा" चित्रपटाची टॅगलाइन होती "Time to Lead" (नेतृत्व करण्याची वेळ आली आहे).
२ फेब्रुवारी २०२४ रोजी विजयने "तमिलगा वेत्री कझगम" (TVK) तमिलकमचा विजय पक्ष स्थापन केला आणि २०२६ च्या तामिळनाडू विधानसभा निवडणुकीत लढण्याचा निर्धार जाहीर केला
पहिली मोठी परिषद (ऑक्टोबर २०२४):
२७ ऑक्टोबर २०२४ रोजी विक्रवांडी येथे TVK ची पहिली राजकीय परिषद झाली, जिला तब्बल ८ लाखांहून अधिक लोक उपस्थित होते. या रॅलीत विजयने पक्षाची विचारधारा जाहीर केली- "धर्मनिरपेक्ष सामाजिक न्याय, समतावाद, द्विभाषा धोरण आणि लोकशाही."
या परिषदेत विजयने BJP ला "वैचारिक विरोधक" आणि DMK ला "राजकीय प्रतिस्पर्धी" असे संबोधले. DMK वर भ्रष्टाचार आणि घराणेशाहीचे आरोप केले.
बूथ पातळीवर संघटन:
फेब्रुवारी २०२५ मध्ये पक्षाने ७०,००० हून अधिक बूथ एजंट नियुक्त करण्याची मोठी मोहीम सुरू केली आणि २०२६ च्या निवडणुकीसाठी पुनर्रचना केली. मदुराईत झालेल्या दुसऱ्या परिषदेत विजयने BJP आणि DMK वर हल्ला चढवत सामाजिक न्यायाचा आवाज उठवला.
७ मार्च २०२६ रोजी महाबलीपुरम येथे आंतरराष्ट्रीय महिला दिनानिमित्त विजयने TVK चा पहिला जाहीरनामा सादर केला. यात महिलाकेंद्री घोषणा प्रमुख होत्या:
महिलांसाठी मासिक आर्थिक मदत
मोफत LPG सिलेंडर
सरकारी बसमध्ये मोफत प्रवास
गरीब कुटुंबातील नवविवाहितेला एक तोळा सोने आणि रेशमी साडी
नवजात बालकासाठी सोन्याची अंगठी आणि वेलकम किट
गरीब विद्यार्थ्यांना शैक्षणिक साहाय्य
महिला सुरक्षा पथक
एकट्याने लढण्याचा निर्धार:
१८ मार्च २०२६ रोजी विजयने जाहीर केले की TVK सर्व २३४ जागांवर एकट्याने निवडणूक लढवणार आहे, कोणत्याही पक्षाशी आघाडी नाही.
लक्ष्य मतदार:
TVK ने मोठ्या प्रमाणावर तरुण आणि पहिल्यांदा मतदान करणाऱ्यांना आकर्षित केले, ज्यामुळे तो तामिळनाडूच्या राजकारणातील महत्त्वाचा नेता बनला.
२३ एप्रिल रोजी झालेल्या सर्व २३४ मतदारसंघांत ८४.८०% मतदान झाले. आज तामिळनाडूमध्ये मतमोजणी सुरू झाली यात TVK १०३ जागांवर आघाडीवर आहे.
TVK ने ऐतिहासिकदृष्ट्या DMK विरुद्ध AIADMK असलेल्या द्विध्रुवीय स्पर्धेला तोडून तिसरा राजकीय अक्ष निर्माण केला, विशेषतः शहरी भागात. विजयने स्वतः सांगितले की २०२६ ची निवडणूक हा TVK च्या राजकीय प्रवासातील पहिला टप्पा आहे. सध्याच्या निकालावरुन तरी विजय हा तामिळनाडूत किंगमेकर ठरण्याची शक्यता आहे.