Viral Video Woman throws dog in river
काठमांडू : नेपाळमध्ये एका महिलेने निष्पाप कुत्र्याला पुलावरून नदीत फेकल्याचा क्रूर व्हिडीओ सोशल मीडियावर मोठ्या प्रमाणात व्हायरल झाला आहे. या घटनेनंतर नेटकऱ्यांनी संताप व्यक्त करत संबंधित महिलेवर कठोर कारवाई करण्याची मागणी केली आहे. व्हिडीओ पोलिसांना मिळाल्यानंतर या प्रकरणाचा तपास सुरू करण्यात आला आहे.
नेपाळमधील बझांग जिल्ह्यातील चैनपूर येथून व्हायरल झालेल्या व्हिडीओमध्ये लाल रंगाचा कुर्ता-सलवार परिधान केलेली एक महिला नदीच्या पुलावर कुत्र्याला दोन्ही हातांनी पकडून उभी असल्याचे दिसते. कुत्रा महिलेच्या तावडीतून सुटून पळण्याचा प्रयत्न करतो; मात्र महिला त्याला पुन्हा पकडते. त्यानंतर ती कुत्र्याला पुलावरून थेट खाली सेती नदीच्या वेगवान प्रवाहात फेकून देताना दिसत आहे.
व्हिडिओमध्ये कुत्रा नदीत पडल्यानंतर पाण्यात वाहून जाताना स्पष्टपणे दिसत आहे. हा संपूर्ण प्रकार तिथून जाणाऱ्या अन्य एका व्यक्तीने आपल्या कॅमेऱ्यात रेकॉर्ड केल्याची माहिती समोर आली आहे. मात्र, हा व्हिडिओ नेमका कधी शूट करण्यात आला आणि कुत्र्याची त्यानंतर काय अवस्था झाली, याबाबतची कोणतीही अधिकृत माहिती अद्याप समोर आलेली नाही.
या घटनेची माहिती मिळताच बझांग पोलिसांचे एक पथक घटनास्थळी (पुलावर) पोहोचले आणि त्यांनी परिसरात शोध घेतला, मात्र कुत्र्याबाबत कोणताही मागमूस लागला नाही. पोलिसांनी संबंधित महिलेची ओळख पटवण्यासाठी तपास सुरू केला आहे. पोलिसांच्या म्हणण्यानुसार, नेपाळमध्ये प्राण्यांवरील क्रूरतेविरुद्ध कायदे अस्तित्वात आहेत आणि ते सध्या या प्रकरणाशी संबंधित पुरावे गोळा करत आहेत.
व्हिडीओ सोशल मीडियावर व्हायरल झाल्यानंतर नेटकऱ्यांनी महिलेविरोधात संताप व्यक्त केला. अनेक सोशल मीडिया वापरकर्त्यांनी पोलिसांकडे महिलेची ओळख पटवून तिला अटक करण्याची तसेच तिच्यावर कायदेशीर कारवाई करण्याची मागणी केली.