Mumbai Local Viral Reel: सोशल मीडियावर व्हायरल होण्यासाठी काही तरुण धोकादायक प्रकार करत असल्याच्या घटना वारंवार समोर येत आहेत. आता ठाणे परिसरातील दिघा येथील एका तरुणाचा असाच एक व्हिडिओ व्हायरल झाला आहे. या व्हिडिओमध्ये तो मुंबई लोकल ट्रेनच्या दिशेने दगड फेकत असताना आणि प्रवाशांकडे अश्लील हावभाव करताना दिसत असल्याचा आरोप आहे.
व्हिडिओ व्हायरल झाल्यानंतर रेल्वे पोलिस आणि आरपीएफने या तरुणाची ओळख पटवली. त्याच्यावर रेल्वे कायद्यातील संबंधित कलमांनुसार कारवाई करण्यात आली आहे. मात्र कारवाईनंतर या तरुणाने सोशल मीडियावर माफी मागणारा व्हिडिओ पोस्ट केला आहे.
माफी मागताना या तरुणाने हात जोडून लोकांची माफी मागितली. त्याच्या म्हणण्यानुसार, त्याने हा संपूर्ण प्रकार फक्त सोशल मीडिया रील तयार करण्यासाठी केला होता.
त्याने दावा केला की, दगड प्रत्यक्षात लोकल ट्रेनवर फेकला नव्हता. दगड बाजूला फेकून आपण ट्रेनच्या दिशेने दगड फेकत असल्याचा केवळ अभिनय केला होता. व्हिडिओमध्ये तसे दिसावे, यासाठी हा प्रकार केल्याचे त्याने सांगितले. या तरुणाने पुढे असे कृत्य पुन्हा कधीही करणार नसल्याचेही म्हटले आहे.
हा व्हिडिओ सोशल मीडियावर मोठ्या प्रमाणात व्हायरल झाल्यानंतर ठाणे रेल्वे पोलिसांच्या निदर्शनास हा प्रकार आला. त्यानंतर पोलिसांनी व्हिडिओची चौकशी सुरू केली आणि संबंधित तरुणाची ओळख पटवली.
मिळालेल्या माहितीनुसार, त्याच्याविरोधात आरपीएफ सानपाडा यांनी रेल्वे कायद्यातील संबंधित तरतुदींनुसार गुन्हा नोंदवला आहे. पोलिस आता व्हिडिओची आणि संपूर्ण घटनेची तपासणी करत आहेत.
तरुणाने आपण दगड ट्रेनवर फेकला नसल्याचा दावा केला असला, तरी पोलिस या प्रकरणाची पडताळणी करत आहेत. कारण धावत्या ट्रेनवर दगड फेकणे हा अत्यंत गंभीर आणि धोकादायक प्रकार आहे. अशा प्रकारामुळे ट्रेनमधील प्रवाशांना दुखापत होऊ शकते. खिडकीची काच फुटून मोठा अपघातही घडू शकतो.
सोशल मीडियावर व्हायरल होण्यासाठी अनेकजण धोकादायक स्टंट करताना दिसतात. मात्र रेल्वे रुळांजवळ व्हिडिओ शूट करणे, धावत्या ट्रेनजवळ जाणे किंवा प्रवाशांच्या सुरक्षेला धोका निर्माण करणारे कृत्य करणे हा गंभीर गुन्हा आहे.
काही सेकंदांच्या रीलसाठी केलेली चूक मोठ्या दुर्घटनेचे कारण ठरू शकते. त्यामुळे व्हायरल होण्याच्या नादात स्वतःचा किंवा इतरांचा जीव धोक्यात घालू नये.
