Monsoon update : दीर्घप्रतीक्षेनंतर अखेर उत्तर भारतासह देशाच्या विविध भागांत मान्सून पूर्णपणे सक्रिय झाला आहे. बुधवारी रात्री दिल्ली आणि आसपासच्या परिसरात झालेल्या मुसळधार पावसामुळे दिल्लीकरांना गेल्या काही दिवसांपासून छळणाऱ्या असह्य उकाड्या आणि उष्णतेपासून मोठा दिलासा मिळाला आहे. दरम्यान, हवामान विभागाने (IMD) देशातील अनेक राज्यांमध्ये मुसळधार ते अतिमुसळधार पावसाचा इशारा दिला असून वेगवेगळ्या भागांसाठी 'अलर्ट' जारी केला आहे.
एकीकडे उत्तर भारतात पाऊस स्थिरावत असताना, पुढील ४ ते ५ दिवसांत कोकण, गोवा आणि दक्षिण गुजरातमध्ये अत्यंत मुसळधार ते अतिवृष्टीचा इशारा देण्यात आला आहे. खबरदारीचा उपाय म्हणून हवामान विभागाने या दोन्ही राज्यांसाठी आणि गुजरातच्या दक्षिण भागासाठी 'रेड अलर्ट' जारी केला आहे. नागरिकांना आणि पर्यटकांना सतर्क राहण्याचे आवाहन करण्यात आले आहे.
हवामान खात्याच्या अंदाजानुसार, पुढील २ ते ३ दिवसांत मान्सूनचा वेग आणखी वाढणार आहे. पंजाब, हरियाणा, दिल्ली-एनसीआर आणि उत्तर प्रदेशच्या उर्वरित भागांत मान्सून पूर्णपणे सक्रिय होणार असल्याने या भागातही पावसाचा जोर वाढेल.
उष्णतेच्या लाटेनंतर रात्री झालेल्या पावसामुळे दिल्लीतील कमाल तापमानात लक्षणीय घट नोंदवली गेली आहे. सध्या दिल्लीतील तापमान ३२°C ते ३४.८°C दरम्यान खाली आले आहे. हवामान विभागाने दिल्ली आणि राष्ट्रीय राजधानी क्षेत्रासाठी (NCR) 'यलो अलर्ट' जारी केला आहे. आगामी काळात येथे अंशतः ढगाळ आकाश राहून मध्यम स्वरूपाचा पाऊस आणि वादळी वारे वाहण्याची शक्यता वर्तवण्यात आली आहे.
फक्त पश्चिम किनारपट्टीच नव्हे, तर मध्य भारत आणि ओडिशाच्या काही भागांमध्येही मान्सून जोरदार बॅटिंग करणार आहे. या भागातही पुढील काही दिवस मुसळधार ते अतिमुसळधार पावसाचा अंदाज वर्तवण्यात आला असून स्थानिक प्रशासनाला सज्ज राहण्याच्या सूचना देण्यात आल्या आहेत.