IRCTC Scam Money Laundering Case : राष्ट्रीय जनता दलाचे (RJD) प्रमुख लालू प्रसाद यादव आणि त्यांच्या कुटुंबाच्या अडचणीत पुन्हा एकदा मोठी वाढ झाली आहे. आयआरसीटीसी (IRCTC) मनी लाँड्रिंग प्रकरणात बिहारचे माजी मुख्यमंत्री लालू प्रसाद यादव, त्यांच्या पत्नी राबडी देवी आणि मुलगा तेजस्वी यादव यांच्यासह एकूण ९ जणांवर न्यायालयाने अधिकृतपणे दोषारोप निश्चित केले आहेत. त्यांच्यावर मनी लाँड्रिंग प्रतिबंधक कायद्याच्या (PMLA) कलम ३ आणि ४ अंतर्गत हे आरोप ठेवण्यात आले आहेत.दिल्लीतील राऊज एव्हेन्यू कोर्टाने या प्रकरणात दिलासा देत इतर ७ आरोपींची निर्दोष मुक्तता केली आहे. या प्रकरणाची पुढील सुनावणी आता ऑक्टोबर महिन्यात होणार आहे.
लालू प्रसाद यादव केंद्रातील संयुक्त पुरोगामी आघाडी (UPA) सरकारमध्ये रेल्वे मंत्री होते. त्यांच्या कार्यकाळात आयआरसीटीसीच्या दोन हॉटेल्सच्या संचालनाचे कंत्राट एका खासगी कंपनीला देण्यात आले होते. या टेंडर प्रक्रियेत मोठ्या प्रमाणावर गैरव्यवहार झाल्याचा ठपका ठेवण्यात आला आहे.
या प्रकरणातील गुन्हेगारी स्वरूपाच्या आरोपांची तपासणी 'सीबीआय' करत आहे. तर आर्थिक गैरव्यवहाराची (मनी लाँड्रिंग) चौकशी अंमलबजावणी संचालनालय (ED) करत आहे. यापूर्वी १३ ऑक्टोबर २०२५ रोजी सीबीआयच्या विशेष न्यायालयाने लालू प्रसाद यादव, राबडी देवी, तेजस्वी यादव यांच्यासह इतर आरोपींवर दोषारोप निश्चित केले होते. न्यायालयाने त्यांच्याविरोधात फसवणूक, गुन्हेगारी कट रचणे आणि भ्रष्टाचार प्रतिबंधक कायद्याच्या विविध कलमांतर्गत गुन्हे दाखल केले आहेत.
लालू यादव यांच्या देखरेखीखालीच रेल्वे अधिकाऱ्यांनी रांची आणि पुरी येथील आयआरसीटीसी हॉटेल्स लीजवर देण्यासाठी टेंडर प्रक्रियेत फेरफार केल्याचे प्राथमिक तपासात निष्पन्न झाले आहे.