room heater safety tips
नवी दिल्ली : दिल्लीत एक हृदयद्रावक घटना घडली आहे, ज्यामध्ये पती-पत्नी आणि त्यांच्या मुलीचा मृत्यू झाला. दिल्ली मेट्रोमध्ये इंजिनिअर पदावर कार्यरत असलेल्या एका व्यक्तीचे कुटुंब स्टाफ क्वार्टरमध्ये राहत होते. पहाटे २ च्या सुमारास शेजाऱ्यांनी त्यांच्या फ्लॅटमधून धूर निघताना पाहिला.
यानंतर पोलिसांना माहिती देण्यात आली. पोलिसांनी फ्लॅटमध्ये प्रवेश केला असता तिघेही मृत अवस्थेत आढळले. प्राथमिक तपासात ही आग शॉर्ट सर्किटमुळे लागल्याचे समोर आले आहे. मात्र काही लोकांचा असा दावा आहे की, रूम हीटर वापरल्यामुळे फ्लॅटमध्ये शॉर्ट सर्किट झाले आणि त्यांचा मृत्यू झाला. आज आम्ही रूम हीटर वापरणाऱ्यांसाठी काही अत्यंत महत्त्वाच्या सुरक्षिततेसाठी टिप्स सांगणार आहोत.
शॉर्ट सर्किट: अनेकदा रूम हीटर चालवण्यासाठी वायरवर टेप लावून जोड दिला जातो. बराच वेळ हीटर सुरू राहिल्याने वायर गरम होऊन जळू शकते आणि ही आग संपूर्ण घरात पसरू शकते.
रूम हीटर ओव्हरहीट होणे: सलग अनेक तास हीटर चालवल्यामुळे तो प्रमाणाबाहेर गरम होतो. यामुळे हीटरची बॉडी वितळू शकते आणि आग इतर वस्तूंना पकडू शकते.
व्हेंटिलेशन ब्लॉक होणे: रूम हीटरमध्ये हवा खेळती राहण्यासाठी जागा असते. जर ती जागा कशाने झाकली गेली किंवा ब्लॉक झाली, तर हीटरला आग लागू शकते.
ज्वलनशील वस्तूंजवळ ठेवणे: जर रूम हीटर पडदे, ब्लँकेट, गाद्या, कपडे किंवा लाकडी फर्निचरच्या अगदी जवळ ठेवला, तर या वस्तूंना लवकर आग लागते.
झोपताना हीटर सुरू ठेवणे: झोपताना रूम हीटर रात्रभर सुरू ठेवणे ही चूक अतिशय घातक ठरू शकते.
रूम हीटरला कोणत्याही ज्वलनशील वस्तूंपासून किमान ३ फूट लांब ठेवावे.
हीटरला कोणत्याही एक्स्टेंशन बोर्डला लावण्याऐवजी थेट भिंतीवरील सॉकेटमध्ये लावावे.
झोपण्यापूर्वी हीटर वेळेवर बंद करा. झोपताना तो चालू ठेवू नका.
रूम हीटर खरेदी करताना त्यावर ISI मार्क असल्याची खात्री करा आणि त्यात 'ऑटो कट-ऑफ' हे फीचर असणे आवश्यक आहे.