घरात दोन पंखे, तीन बल्ब; वीज बिल आले ३१ लाख

पाटणा : घरात केवळ दोन पंखे आणि तीन बल्बचा वापर करत असताना बिहारच्या वीज खात्याने एका मजुराला तब्बल ३१ लाख रुपये बिल पाठवून जबरदस्त शॉक ट्रिटमेंट दिली आहे. हे बिल दोन महिन्यांचे असल्याचा खुलासा वीज खात्याने केला आहे. मात्र, त्यामुळे शुभलाल सहानी यांचे कुटुंब हैराण झाले आहे.

मुझफ्फरपूरचे रहिवासी असलेले सहानी मजुरी करून कुटुंबाचे पालन-पोषण करतात. घरात मोजकी पाच विजेची उपकरणे वापरूनही त्यांना एवढे अफाट बिल आल्यामुळे ते चिंताग्रस्त झाले आहेत. वीज विभागाकडे त्यांच्या फेऱ्या सुरू आहेत. यावर कळस म्हणजे, वीज बिल न भरल्याने त्यांच्या घरातील वीज जोडणी कापण्यात आली आहे.

दोनच महिन्यांपूर्वी त्यांच्या घरात स्मार्ट मीटर लावण्यात आला होता. त्यानंतर वीजपुरवठा सुरू होता. अचानक वीज जोडणी कापण्यात आली. याचे कारण विचारले असता, तुमचे वीज बिलाचे ३१ लाख रुपये थकीत असल्याचे सांगण्यात आले. त्यामुळे सहानी यांनी कपालातर हात मारून घेतला आहे.