नागपूर ; पुढारी वृत्तसेवा : परकीय चलनात गुंतवणूक केल्यास ३० टक्के मोबदला मिळवून देण्याचे आमिष दाखवून गुंतवणूकदारांची तब्बल साडेतीन कोटींनी फसवणूक केली. याप्रकरणी नागपूर येथील हुडकेश्वर पोलिसांनी कंपनीच्या संचालकासह सात जणांविरुद्ध फसवणुकीचा गुन्हा दाखल केला आहे.
अभिषेक गजानन पाच्चाव (वय ३८, रा. रेणुकामातानगर), रोशन भिवापूरकर (वय ४५, रा. दिघोरी), गजानन पाच्चाव (वय ५८), करण आकरे (वय ३२), रमाकांत कुलकर्णी (वय ६०, रा. सुदर्शननगर), विक्की टाले (वय ३०, रा. पिपळा फाटा) व अनोळखी महिला, अशी गुन्हा दाखल करण्यात आलेल्यांची नावे आहेत. वैभव सुरेशराव पांडव (वय ४०, रा. बापू आकरेनगर, उमरेड मार्ग) यांनी दिलेल्या तक्रारीवरून हा गुन्हा दाखल करण्यात आला.
नोव्हेंबर २०२१ पाच्चाव व त्याच्या साथीदारांनी हॉरिझॉन नावाची कंपनी स्थापन केली. कंपनीचे कार्यालय ताजेश्वरीनगर येथे होते. परकीय चलनात तसेच शेअर बाजारात गुंतवणूक केल्यास ३० ते ४० टक्के मोबादला देण्याचे आमिष त्यांनी गुंतवणूकदारांना दिले.
वैभव पांडव यांनी १० लाख, तर अन्य ७४ गुंतवणूकदारांनी कंपनीत ३ कोटी ६१ लाख ७४ हजारांची गुंतवणूक केली. मुदत संपल्यानंतरही पाच्चाव व त्याच्या साथीदारांनी गुंतवणूकदारांना पैसे परत केले नाही. कंपनीचे कार्यालय बंद केले. फसवणूक झाल्याने वैभव यांनी हुडकेश्वर पोलिसांत तक्रार दिली. पोलिसांनी गुन्हा दाखल करून तपास सुरू केला आहे.