जत; पुढारी वृत्तसेवा : तिंकोडी (ता. जत) येथे एका ऊसतोड मुकादमाचा काठीने मारहाण करत खून केला होता. संशयितांनी हा अपघात झाला असल्याचा बनाव केला होता. अखेर खून असल्याचा उलगडा झाला आहे. खून झालेल्या व्यक्तीचे नाव नामदेव लक्ष्मण तांबे (वय.४५) (रा. करेवाडी _तिंकोडी) असे आहे. ही घटना रविवारी रात्री घडली होती. व मृतावस्थेत नामदेव तिकोंडी कागनरी रस्त्यालगत एका शेतात आढळून आला.
याबाबत मयतचा मुलगा गणेश नामदेव तांबे यांनी पोलिसात फिर्याद दिली आहे. सदरचा गुन्हा नोंद असून खून केल्याप्रकरणी संशयित आरोपी बबन हनमंत कोळेकर (वय.३६) (रा. करेवाडी, को. बोबलाद), बाबू शंकर शेंडगे (वय ३५) रा. तिंकोडी, रामा आप्पाराया बिळूर (वय २७) या तिघांना अटक करण्यात आली आहे.
घटनास्थळी पोलिस उपाधीक्षक रत्नाकर नवले यांनी भेट देऊन कसून तपास करणेबाबतच्या सूचना दिल्या आहेत. याबाबत अधिक माहिती अशी, मयत नामदेव तांबे हे ऊसतोड मुकादम होते. त्यांनी संशयित बबन कोळेकर, बापू शेंडगे, रामा बिळूर या ऊसतोड टोळी धारक व्यक्तींशी आर्थिक व्यवहार केला होता. त्यांनी कामगार न दिल्याने नामदेव येणे परस्पर ऊसतोड कामगाराशी संपर्क साधून परस्पर व्यवहार मिटवले होते. काही ऊसतोड कामगार नामदेव यांनी त्यांच्याकडे घेतले होते.
तसेच संशयितांना दिलेले पैसे परत करावेत म्हणून मयत तांबे यांनी त्यांच्याकडे तगादा लावला होता. याच कारणावरून रविवारी संध्याकाळी नामदेव यास बोलावून घेतले होते. यावरून संशयितांनी तिकोंडी कागनरी रस्त्यालगत असणार्या एका शेतात नामदेव यास काठीने मारहाण करून जखमी केले. यात नामदेवचा मृत्यू झाला. मृत्यूनंतर नामदेवच्या अंगावर मोटरसायकल टाकण्यात आली होती. हा अपघात असल्याचा बनाव करण्यात आला होता. उमदी पोलिसांनी तपासाची सूत्रे अधिक कार्यक्षमतेने करत खुनाचा उलगडा केला. या घटनेत वापरलेली चारचाकी संशयितांची जप्त केली आहे. अधिक तपास सहाय्यक पोलीस निरीक्षक पंकज पवार करत आहेत.
हेही वाचलत का?