नागपूर, पुढारी वृत्तसेवा : दहा दिवस मनोभावे पूजा केल्यानंतर आज (दि.२८) अखेर गणरायांचे शहरात ठिकठिकाणी तयार केलेल्या कृत्रिम तलावात विसर्जन करण्यात आले. पुढल्या वर्षो लवकर या… अशी विनवणी करीत लाडक्या बाप्पाला निरोप देण्यात आला. विशेष म्हणजे आज वरूणराजानेही हजेरी लावली. दहा दिवस उत्साहाच्या वातावरणानंतर आज लाडक्या बाप्पाला पुढच्या वर्षी लवकर या, असे आबालवृद्धांनी साकडे घालत निरोप दिला.
घरगुती बाप्पांच्या विसर्जनासाठी नागपूर महापालिका प्रशासनाकडून ठिकठिकाणी कृत्रिम कुंड तयार करण्यात आले. जलप्रदूषण टाळण्यासाठी अशा पद्धतीचे सुमारे 400 कुंड शहरातील 10 झोनमध्ये तयार करण्यात आले आहेत. कोराडी येथील तलावात विसर्जनासाठी जात असलेल्या तुळशीबाग येथील नागपूरचा राजा गणेशाची विसर्जन मिरवणूक दुपारी सुरू झाली.
श्रींच्या विसर्जनादरम्यान कुठलाही अनुचित प्रकार घडू नये, म्हणून तगडा पोलीस बंदोबस्त तैनात केला आहे. राज्य राखीव दल, होमगार्ड त्यासोबतच अग्निशमन दलाचे पदाधिकारी ठिकठिकाणी तैनात आहेत. अनंत चतुर्दशी असल्याने आज बहुतांशी घरगुती गणेशमूर्ती काही सार्वजनिक मंडळांचे तर उद्या भाद्रपद पौर्णिमा असल्याने इतर मंडळांचे गणेश विसर्जन होणार आहे.
हेही वाचा