पुढारी वृत्तसेवा नागपूर : राज्याचे माजी गृहमंत्री, राष्ट्रवादी काँग्रेसचे ज्येष्ठ नेते अनिल देशमुख दीड वर्षानंतर उद्या (11 फेब्रुवारी) नागपुरात येत आहेत. यानिमित्ताने त्यांच्या सिव्हील लाईन्स, जीपीओ चौकातील निवासस्थानी जल्लोषाचे वातावरण आहे. शहर व जिल्हा राष्ट्रवादी काँग्रेसने त्यांचे जंगी स्वागत करणार असल्याचे सांगण्यात आले आहे. विमानतळावरील स्वागतानंतर ते वर्धा रोडवरील साई मंदिरात दर्शन, व्हेरायटी चौक गांधी पुतळा, संविधान चौक येथे डॉ. बाबासाहेब आंबेडकर पुतळ्याला अभिवादन करतील. (Anil Deshmukh)
अनिल देशमुख नागपुरात असल्यानिमित्त त्यांचे निर्दोषत्व सिद्ध करणारे सुमारे एक लाखावर पत्रकांचे वितरण केले जाणार आहे. 12 फेब्रुवारीला राष्ट्रवादी काँग्रेसचे राष्ट्रीय अध्यक्ष शरद पवार देखील दोन दिवस विदर्भात आहेत. नागपूर व सेवाग्राम, वर्धा येथे त्यांचे विविध कार्यक्रम आहेत.
राष्ट्रवादी काँग्रेसचे शहराध्यक्ष दूनेश्वर पेठे, प्रदेश पदाधिकारी शेखर सावरबांधे यांच्या नेतृत्वात पत्रक वितरित केले जाणार आहे. हायकोर्टाने दिलेला दिलासा, सीबीआय, ईडीच्या तपासात काहीही हाती न लागणे या सर्व गोष्टींचा संदर्भ यात देण्यात आला आहे. आपण कुठला गुन्हा केला ? 30 वर्षे बेदाग राजकारण, समाजकारण करीत असताना आपल्याला विनाकारण अडकवण्यात आले. अशा प्रकारची अनिल देशमुख यांची भूमिका जनतेत पोहोचविण्याचा राष्ट्रवादी काँग्रेसचा प्रयत्न आहे. विदर्भातील राष्ट्रवादी काँग्रेसचे मोठे नेते मानले जातात . यामुळेच आता ते पक्षवाढीसाठी आक्रमकपणे कामाला लागणार असल्याचे संकेत मिळत आहेत.
हेही वाचा :