ठाणे: व्हेल माशाची २.७२ कोटीच्या उलटीची विक्री करण्यासाठी ठाण्याच्या जांभळी नाक्यावर आलेल्या एका महिला आणि पुरुषाला ठाणे गुन्हे शाखा युनिट-१ च्या पथकाने अटक केली.
त्यांच्याकडून २ किलो ७२० ग्राम वजनाची उलटी हस्तगत करण्यात आली. दोघांच्या विरोधात ठाणे नगर पोलीस ठाण्यात गुन्हा दाखल करण्यात आलेला आहे. पोलीस अधिक चौकशी करीत आहेत.
ठाणे गुन्हे शाखा युनिट-१ च्या पथकातील कर्तव्यावरील पो.ह. गणेश बडगुजर याना त्यांच्या खबऱ्याद्वारे आलेल्या गोपनीय माहितीची खातरजमा करीत विपिनी अनिल शिंदे यांच्या मार्गदर्शनाखाली ५ आक्टोबर रोजी ६ वाजण्याच्या सुमारास ठाण्याच्या हायलॅन्ड रेसिडेन्सी लॉज जवळ, जांभळी नाका, ठाणे पश्चिम या ठिकाणी सापळा रचून मयुर, रा. कोल्हापूर, तसेच मिनाक्षी, रा. सिंधुदुर्ग याना अटक केली.
त्यांच्या अंगझडतीत त्यांच्याकडे २ किलो ७२० ग्रॅम वजनाची व्हेल माशाची उलटी आढळली. त्याची अंतरराष्ट्रीय बाजारपेठेत २ कोटी ७२ लाख रुपये असल्याची माहिती पोलिसांनी दिली. या दोघा आरोपीच्या विरोधात ठाणे नगर पोलीस ठाण्यात वन्यजीव संरक्षण अधिनियम अन्वये गुन्हा दाखल करण्यात आला आहे.