Rajendra Shinde Pradeep Purnekar Murder Case: शिवसेना (उद्धव बाळासाहेब ठाकरे) पक्षाचे विभागप्रमुख प्रदीप पूर्णेकर यांच्या हत्येप्रकरणी ठाणे गुन्हे शाखेने तपास सुरु केला आहे. या प्रकरणात शिंदे गटाच्या माजी महापौर मीनाक्षी शिंदे यांचे पती राजेंद्र शिंदे यांची तब्बल नऊ तास चौकशी करण्यात आली. यावेळी हत्येप्रकरणी अटक केलेले पाचही आरोपी आपल्या ओळखीचे असल्याचे राजेंद्र शिंदे यांनी सांगितले. मात्र, या हत्येशी आपला कोणताही संबंध नसल्याचा दावा त्यांनी केला आहे.
आरोपींशी ओळख असल्याचे मान्य
मंगळवारी गुन्हे शाखेने राजेंद्र शिंदे यांना चौकशीसाठी बोलावले होते. यावेळी पोलिसांनी त्यांना अटकेतील आरोपींसमोर बसवून विविध प्रश्न विचारले. आरोपी आपल्याकडे कामासाठी येत असल्याचे शिंदे यांनी सांगितले. पत्नी नगरसेविका असल्यामुळे परिसरातील अनेक लोकांशी संपर्क येतो. त्यातूनच आरोपींशी ओळख झाली. मात्र, हत्येच्या कटात आपला सहभाग नसल्याचे त्यांनी स्पष्ट केले.
पूर्णेकर यांच्या मुलाचे गंभीर आरोप
दरम्यान, प्रदीप पूर्णेकर यांचा मुलगा राम पूर्णेकर यांनी यापूर्वीच मीनाक्षी शिंदे आणि राजेंद्र शिंदे यांच्यावर गंभीर आरोप केले आहेत. हत्येपूर्वी काही दिवस आरोपींना राजेंद्र शिंदे यांच्या 'निळकंठ' इमारतीबाहेर पाहिल्याचा दावा त्यांनी केला आहे. याच ठिकाणी हत्येचा कट रचल्याचा संशयही त्यांनी व्यक्त केला आहे.
कार्यालयात घुसून केली होती हत्या
29 सप्टेंबर रोजी रात्री साडेनऊच्या सुमारास मनोरमानगर येथील कार्यालयात प्रदीप पूर्णेकर यांच्यावर गोळीबार करण्यात आला होता. त्यानंतर धारदार शस्त्राने वार करून त्यांची हत्या करण्यात आली. या प्रकरणात पोलिसांनी पाच संशयितांना अटक केली आहे.
आता आरोपी आणि राजेंद्र शिंदे यांच्यातील फोनवरील संभाषण, आर्थिक व्यवहार आणि भेटीगाठींची माहिती पोलीस तपासत आहेत. पूर्णेकर कुटुंबीयांनी स्वतंत्र तपासाची मागणी केली असून, पुढील चौकशीत नेमके काय समोर येते, याकडे ठाण्यातील राजकीय वर्तुळाचे लक्ष लागले आहे.