करमाळा: सरकारी कामात अडथळा आणल्या प्रकरणी करमाळा पोलिसात पोलिसाविरुद्धच गुन्हा दाखल करण्यात आला असून तालुक्यातील केम मंडल निरीक्षकांची त्यांनी घेतलेल्या जबाबाची कागदपत्रे संशयित आरोपी असणाऱ्या पोलिसांनीच फाडली असल्याने सर्वत्र खळबळ उडाली आहे.
विकास बाळू देवकर रा.केम असे गुन्हा दाखल झालेल्या पोलीस असलेल्या संशयित आरोपीचे नाव आहे. याची फिर्याद मिरा गोरोबा नागटिळक वय - ४१ वर्ष ( मंडल अधिकारी केम) रा. कुर्डवाडी ता. माढा जि. सोलापूर यांनी करमाळा पोलिसात दिली आहे. हा प्रकार १८ जून रोजी सकाळी ११ वाजण्याच्या सुमारास पाथर्डी येथील गट नंबर ५६७ या ठिकाणी घडला आहे.
याबाबतची हकीगत अशी की, पाथुर्डी, मौजे केम गट नं. ५६७ मध्ये त्यांच्या रस्त्यासाठीच्या तहसीलदार करमाळा यांचेकडे तारखा चालू होत्या. त्यासाठी तहसीलदार मॅडम यांचे आदेशाने सदर शेती गट नं. ५६७ चे ठिकाणी मंडल अधिकारी म्हणून मीरा नागटिळक यांना प्राधिकृत केले होते. सदर आदेशाप्रमाणे गट न ५६७ मध्ये जावून वादी प्रतिवादी यांना बोलावून घेवून पंचासमक्ष स्थळ पाहणी पंचनामा करून १८ जून २५ रोजी सकाळी ११ वा चे सुमारास जबाब नोंदविले. ते जबाब त्यांचे सांगणेप्रमाणे नोंदविले. त्यानंतर त्यांचे जबाब त्यांना वाचून दाखविले .त्यानंतर त्यांनी त्यावर सह्या व अंगठा केला. तसेच त्या जबाबावर मंडल निरीक्षक म्हणून सही पण केली होती. त्याच वेळी प्रतिवादी बाळू लिंबाजी देवकर यांचा मुलगा विकास बाळू देवकर हा पोलीस गणवेशात तेथे आला व त्याने त्याच्या वडीलांचा घेतलेला जबाब वाचण्यासाठी मागितला तो त्यास जबाब दिल्यानंतर त्याने वाचून पाहीला.
यावेळी संशयित आरोपी बाळू देवकर म्हणाला की यामध्ये दोन शब्द राहीलेले आहेत. त्यावेळी तो जबाब मंडळ निरीक्षक नाग टिळक यांनी हातात परत घेऊन सांगितले की हा जवाब आता पूर्ण झालेला आहे तुमच्या वडिलांनी व भावांनी सह्या अंगठे केलेले आहेत. असे म्हटले नंतर संशयित आरोपीं विकास बाळू देवकर याने लागलीच हातातील तो जबाब जबरदस्तीने घेवून फाडून टाकून दुसरा जबाब घ्या असे म्हणाला. यावेळी त्याने शिवीगाळी करून करीत असलेल्या सरकारी काम करताना जबाब घेण्याचे काम करण्यास प्रतिबंध केला. त्यानंतर बाळू देवकर याने स्वतःचे हस्ताक्षरात जबाब लिहीला व त्यावर त्याचे वडीलांची स्वाक्षरी घेतली. तो जबाब मंडळ अधिकारी नागटिळक यांच्याकडे दिला. तो जबाब मंडळ अधिकारी मीरा नागटिळक यांनी कागदपत्रात सामिल केला. यानंतर विकास बाळु देवकर याने मंडल निरीक्षक मीरा नागटिळक यांनी नोंदविलेला जबाब फाडुन टाकलेबाबत वरीष्ठांशी चर्चा करून सरकारी कामात अडथळा केल्याने त्याची तक्रार करमाळा पोलिसात दिली .
याबाबत करमाळा पोलिसांत पोलीस असलेल्या संशयित आरोपी बाळू देवकर रा. केम यांच्या विरोधात भारतीय न्याय संहिता १३२, ३५२ अन्वये गुन्हा दाखल करण्यात आला असून सहाय्यक पोलीस उपनिरीक्षक अभिमान गुटाळ हे याचा तपास करीत आहेत.