येथे पंधरा वर्षांच्या अल्पवयीन मुलीवर बलात्कार झाल्याचे उघड झाले. खुनाच्या गुन्ह्यात पॅरोलवर सुटलेल्या गुंडाने हा बलात्कार केल्याचे पोलिसांनी सांगितले. संजय प्रकाश माने (वय 34) असे संशयिताचे नाव आहे. बलात्काराची घटना शुक्रवारी रात्री साडेनऊच्या सुमारास घडली.बदलापूर, कोलकाता, कोल्हापूर आदी ठिकाणी झालेल्या घटनांच्या निषेधार्थ जिल्ह्यात निषेध आंदोलने सुरू असताना बलात्काराची ही घटना उघड झाली. त्यामुळे जिल्ह्यातून संतापाची लाट पसरली. त्याचे पडसाद समाजमाध्यमातही उमटले. बलात्कार झाल्याचे समजल्यावर संजयनगर पोलिस ठाण्यासमोर मोठा जमाव जमा झाला.
जमावाने निदर्शने करीत दोषीला फाशी देण्याची मागणी केली. त्यामुळे परिसरात काहीकाळ तणाव होता. घटनेची गांभीर्याने दखल घेत संजयनगर पोलिसांनी दीड तासात संशयित संजय माने याला भिवघाट (ता. खानापूर) येथून ताब्यात घेतले. त्याला अटक झाल्याचे समजताच तणाव निवळला. पीडित मुलीच्या कुटुंबीयांनी संजयनगर पोलिस ठाण्यात फिर्याद दिली. त्यानुसार बाललैंगिक छळ प्रतिबंधक कायदा (पोक्सो)सह अन्य कलमांनुसार मानेवर गुन्हा दाखल करण्यात आला. याबाबत पोलिसांनी दिलेली माहिती अशी की, सराईत गुन्हेगार संजय व पीडिता एकाच परिसरात राहतात. तो काही महिन्यांपूर्वीच पॅरोलवर सुटला होता. गेल्या महिन्यात त्याने पीडित मुलीस, तू मला आवडतेस, असे म्हणून तिचा हात पकडत विनयभंग केला होता. पण त्याबाबत पीडितेने वाच्यता केली नव्हती.
शुक्रवारी रात्री साडेनऊच्या सुमारास पीडित मुलगी खाऊ आणण्यासाठी दुकानात गेली होती. यावेळी मानेने तिला बोलाविले. ओळखीचा असल्याने ती त्याच्याजवळ गेली. त्याने तिचे तोंड दाबून तिला आपल्या घरात नेऊन लैंगिक अत्याचार केले. याबाबत कुठे वाच्यता करू नये म्हणून धमकीही दिली. शनिवारी सकाळी पीडितेने हा प्रकार कुटुंबीयांना सांगितला. त्यानंतर पीडितेच्या आईने संजयनगर पोलिस ठाण्यात धाव घेतली. निरीक्षक बयाजीराव कुरळे यांनी तातडीने गुन्हा दाखल करून संशयितांच्या शोधासाठी पथके रवाना केली. सहायक निरीक्षक गणेश कोकाटे, कपिल साळुंखे, दीपक गायकवाड यांनी संशयित माने याचा माग काढून त्याला भिवघाट येथे ताब्यात घेतले. पोलिस निरीक्षक बयाजीराव कुरळे तपास करीत आहेत.
संशयित माने हा सराईत गुन्हेगार आहे. 2011 मध्ये शहरातील प्रिया हॉटेलसमोर झालेल्या खुनात त्याचा सहभाग होता. एप्रिल 2013 मध्ये त्याला या खुनाबद्दल 14 वर्षे शिक्षा झाली होती. त्याच्यावर खुनी हल्ल्याचाही गुन्हा दाखल आहे.
घटना समजताच संजयनगर पोलिस ठाण्यासमोर मोठा जमाव जमा झाला. काँग्रेस नेत्या जयश्री पाटील, भाजपचे शिवाजी ऊर्फ पप्पू डोंगरे, माजी नगरसेवक मनोज सरगर, संजय कांबळे यांच्यासह अनेकांनी पोलिस ठाण्यासमोर ठिय्या मारला. संशयितावर कठोर कारवाई करावी, त्याला फाशी द्यावी, खटला जलदगती न्यायालयात चालवावा, अशी मागणी करीत जमावाकडून घोषणाबाजीही झाली. कायदा, सुव्यवस्थेचा प्रश्न निर्माण होऊ नये, यासाठी तातडीने दंगल नियंत्रण पथकालाही पाचारण केले होते.