Ganeshotsav Konkan Travel Traffic Advisory
पनवेल : आगामी गणेशोत्सवाच्या पार्श्वभूमीवर मुंबई-पुणे, मुंबई-गोवा तसेच कोकणाकडे जाणाऱ्या महामार्गांवर मोठ्या प्रमाणात वाहतूक वाढण्याची शक्यता आहे. गणेशभक्त, चाकरमानी आणि वाहनचालकांचा प्रवास सुरक्षित व अपघातमुक्त व्हावा, यासाठी प्रादेशिक परिवहन कार्यालय, पनवेलतर्फे ‘Black Spot RTO Panvel’ हे विशेष मोबाईल अॅप विकसित करण्यात आले आहे. कोकण प्रवासाला निघण्यापूर्वी वाहनचालकांनी या अॅपचा वापर करावा, असे आवाहन आरटीओकडून करण्यात आले आहे.
या अॅपच्या माध्यमातून महामार्गावरील अपघातप्रवण ठिकाणे अर्थात ‘ब्लॅक स्पॉट’, धोकादायक वळणे तसेच संभाव्य धोकादायक क्षेत्रांची माहिती वाहनचालकांना आधीच मिळणार आहे. वाहन संबंधित ठिकाणाच्या जवळ पोहोचताच अॅपद्वारे चालकाला अलर्ट मिळणार असल्याने वेग कमी करून आवश्यक ती खबरदारी घेणे शक्य होणार आहे.
‘Black Spot RTO Panvel’ हे अॅप Android आणि iOS या दोन्ही प्लॅटफॉर्मवर मोफत उपलब्ध आहे. Google Play Store तसेच Apple App Store वरून प्रवासी आणि वाहनचालकांनी प्रवास सुरू करण्यापूर्वी हे अॅप मोबाईलमध्ये डाऊनलोड करून त्याचा वापर करावा, असे आरटीओने म्हटले आहे.
"Black Spot RTO Panvel – Google Play Store" https://reference-url-citation.invalid/0
गणेशोत्सवाच्या काळात महामार्गांवरील वाढती गर्दी लक्षात घेता वाहनचालकांनी वेगमर्यादेचे पालन करावे, धोकादायक पद्धतीने ओव्हरटेकिंग टाळावे, चारचाकी वाहनचालकांनी सीटबेल्ट तर दुचाकीस्वारांनी हेल्मेटचा अनिवार्य वापर करावा, असे आवाहन करण्यात आले आहे.
मद्यपान अथवा अमली पदार्थांचे सेवन करून वाहन चालवू नये. तसेच वाहन चालवताना थकवा किंवा झोप येत असल्यास सुरक्षित ठिकाणी वाहन थांबवून पुरेशी विश्रांती घ्यावी आणि त्यानंतरच पुढील प्रवास करावा, असेही आरटीओकडून स्पष्ट करण्यात आले आहे.
‘बाप्पाच्या आगमनाचा आनंद द्विगुणित करण्यासाठी सुरक्षित वाहन चालवा आणि कुटुंबासह सुखरूप घरी पोहोचा,’ असा संदेश प्रादेशिक परिवहन कार्यालय, पनवेल यांच्या वतीने देण्यात आला आहे.