Panvel Karjat Railway Line pudhari photo
रायगड

Panvel Karjat Railway Line : पनवेल -कर्जत रेल्वेमार्गाचे काम अंतिम टप्प्यात

स्थानकात दोन स्वतंत्र प्लॅटफॉर्मची कामे युद्धपातळीवर; एक तासाचा प्रवास येणार अवघ्या वीस मिनिटांवर

पुढारी वृत्तसेवा

खांदा कॉलनी : पनवेल ते कर्जत या बहुप्रतीक्षित उपनगरीय रेल्वे मार्गाची प्रतीक्षा आता अंतिम टप्प्यात पोहोचली आहे. या मार्गावरून प्रवास करण्याचे स्वप्न पाहणाऱ्या पनवेलकरांसह हार्बर रेल्वे मार्गावरील प्रवाशांमध्ये उत्सुकता वाढली आहे. पनवेल रेल्वे स्थानकात पनवेल-कर्जत रेल्वेसाठी स्वतंत्र दोन प्लॅटफॉर्म उभारण्याचे काम सध्या युद्धपातळीवर सुरू आहे. प्लॅटफॉर्मवर फरशी बसविण्याचे काम वेगाने सुरू असून, प्रवाशांच्या सोयीसाठी स्वयंचलित जिनेही बसविण्यात आले आहेत.

पनवेल-कर्जत रेल्वे मार्ग हा नवी मुंबई आणि रायगड जिल्ह्यातील प्रवाशांसाठी महत्त्वाचा प्रकल्प ठरणार आहे. सध्या पनवेलहून कर्जतपर्यंत जाण्यासाठी रस्ते मार्गाने प्रवास करताना मोठा वेळ खर्च करावा लागतो. मात्र, या उपनगरीय रेल्वे सेवेमुळे प्रवाशांचा प्रवास अधिक जलद आणि सोयीस्कर होणार आहे.

या रेल्वे मार्गामुळे सध्याचा जवळपास एक तासाचा प्रवास अवघ्या २० मिनिटांवर येण्याची अपेक्षा व्यक्त केली जात आहे. त्यामुळे नोकरी, व्यवसाय, शिक्षण आणि अन्य कामांसाठी दररोज प्रवास करणाऱ्या नागरिकांना मोठा दिलासा मिळणार आहे.

या प्रकल्पांतर्गत पनवेल ते कर्जतदरम्यान चार नवीन रेल्वे स्थानकांचा समावेश आहे. या स्थानकांमुळे मार्गावरील गावांना आणि नव्याने विकसित होत असलेल्या नागरी वसाहतींना उपनगरीय रेल्वेचे जाळे उपलब्ध होणार आहे. विशेषतः पनवेल, कळंबोली आणि परिसरातील प्रवाशांना या मार्गाचा मोठा फायदा होण्याची शक्यता आहे.

पनवेल रेल्वे स्थानकात सुरू असलेली प्लॅटफॉर्मची कामे पाहता प्रकल्पाच्या पूर्णत्वाबाबत आशावाद निर्माण झाला आहे. प्लॅटफॉर्मवरील फरशी, जिने आणि अन्य प्रवासी सुविधांची कामे पूर्णत्वाकडे जात असल्याचे चित्र आहे. यामुळे यंदाच पनवेल-कर्जत रेल्वे सेवा सुरू होईल, अशी अपेक्षा प्रवाशांकडून व्यक्त केली जात आहे. मात्र, प्रत्यक्ष सेवा सुरू होण्याची तारीख रेल्वे प्रशासनाच्या अधिकृत घोषणेनंतरच स्पष्ट होणार आहे.

एकीकडे पनवेल शहराचा विस्तार झपाट्याने होत असताना दुसरीकडे रेल्वे कनेक्टिव्हिटी वाढण्याच्या दृष्टीने हा प्रकल्प महत्त्वाचा मानला जात आहे. त्यामुळे पनवेल-कर्जत रेल्वे ही केवळ नवीन रेल्वे सेवा नसून पनवेल आणि परिसराच्या विकासाला गती देणारी महत्त्वाची वाहतूक सुविधा ठरणार आहे. आता प्रवाशांचे लक्ष रेल्वे प्रशासनाच्या अंतिम चाचण्या, सुरक्षा प्रमाणपत्र आणि अधिकृत उद्घाटनाकडे लागले आहे.

हार्बर प्रवाशांसाठीही दिलासा

पनवेल हे हार्बर रेल्वे मार्गावरील महत्त्वाचे स्थानक आहे. येथे दररोज हजारो प्रवाशांची ये-जा असते. पनवेल-कर्जत रेल्वे सुरू झाल्यानंतर हार्बर रेल्वे मार्गावरील प्रवाशांना कर्जत दिशेने जाण्यासाठी अधिक सोयीचा पर्याय उपलब्ध होणार आहे. त्यामुळे रस्त्यावरील वाहतुकीचा ताण कमी होण्यासही मदत होऊ शकते. हार्बर मार्गावरील प्रवाशांसाठी हा दिलासा ठरणार आहे.

लोकल ते ग्लोबल बातम्यांसाठी डाऊनलोड करा दैनिक पुढारीचे Android आणि iOS मोबाईल App.

'Pudhari' is excited to announce the relaunch of its Android and iOS apps. Stay updated with the latest news at your fingertips.

Android and iOS Download now and stay updated, anytime, anywhere.

SCROLL FOR NEXT