म्हसळा : कोकणात शिमगा अर्थात होळी उत्सवाचा जल्लोष सुरू असताना, म्हसळा तालुक्यात हादरवून सोडणारी घटना उघडकीस आली आहे. तालुक्यातील दगडघूम गावाच्या हद्दीत असलेल्या धेनू चव्हाण यांच्या चिरा दगड खाणीत काम करणाऱ्या एका कामगाराने आपल्या नवविवाहित पत्नीची दगडाने ठेचून हत्या केल्याची धक्कादायक बाब समोर आली आहे.
बीजापूर येथील मूळनिवासी असलेल्या सतीश चव्हाण आणि त्याची पत्नी निकिता यांचा सात महिन्यांपूर्वी विवाह झाला होता. ते दगडघूम येथील चिरा दगड खाणीत मजुरीचे काम करीत होते. दोघांमध्ये काहीतरी बिनसल्याने सतीशने पत्नी निकिताला रागाच्या भरात खाणीशेजारील परिसरात नेले आणि तेथे डोक्यात लाकूड मारून
आणि तिच्या चेहऱ्यावर दगड घालून तिची हत्या केल्याचे प्राथमिक तपासात समोर आले आहे. पत्नी निकिता कुठेतरी जंगलात निघून गेल्याचे खोटे सांगून त्याने खाण मालकाची दिशाभूल करण्याचा प्रयत्न केला. ही बाब संशयास्पद वाटल्याने खाण मालकाने म्हसळा पोलीस ठाणे येथे तक्रार दाखल केली.
पोलिसांनी सतीशची चौकशी केली असता,त्याने विसंगत उत्तरे दिल्याचे लक्षात येताच त्यांनी त्याला ताब्यात घेतले. त्यानंतर त्याने पत्नीची हत्या केल्याची कबुली दिली. याप्रकरणी आरोपीविरुद्ध खुनाचा गुन्हा दाखल केला आहे. म्हसळा तालुक्यात आठ ते नऊ ठिकाणी जांभा दगड उतखणन सुरु असून या खाणींवर काही काही घटना घडत असतात त्यामुळे तेथील कामगारांच्या सुरक्षेचा प्रश्न ऐरणीवर आला आहे.