पुणे : आगामी विधान परिषद निवडणुकीसाठी भारतीय जनता पक्षाने पुणे पदवीधर मतदारसंघातून शिक्षणतज्ज्ञ डॉ. स्मिता योगेश जाधव यांना उमेदवारी जाहीर केली आहे. भाजपचे राष्ट्रीय मुख्यालय प्रभारी तरुण चुघ यांनी पत्रक जारी करत ही घोषणा केली असून, भाजपने डॉ. जाधव यांच्या रूपाने या मतदारसंघात एक उच्चशिक्षित आणि सक्षम चेहरा रिंगणात उतरवला आहे.
डॉ. स्मिता योगेश जाधव यांनी तंत्रज्ञान, व्यवस्थापन आणि शिक्षण अशा तिन्ही प्रमुख शाखांचे उच्च शिक्षण पूर्ण केले आहे:
बी.ई. (कॉम्प्युटर्स)
एमबीए (फायनान्शियल मॅनेजमेंट)
पीएच.डी. (एज्युकेशन)
तंत्रज्ञान आणि अर्थशास्त्राची उत्तम जाण असण्यासोबतच त्यांनी शिक्षण विषयात डॉक्टरेट पूर्ण केल्यामुळे शैक्षणिक प्रशासनाचा त्यांना सखोल अभ्यास आहे.
शिक्षण क्षेत्रात नवकल्पना, सर्जनशीलता आणि धोरणात्मक नेतृत्वाचा मेळ घालत नवे बदल घडवण्यात डॉ. स्मिता योगेश जाधव यांचे भरीव योगदान राहिले आहे. सध्या त्या महत्त्वाच्या पदांवर कार्यरत आहेत.
प्र-कुलगुरू : पिंपरी (पुणे) येथील नामांकित डॉ. डी. वाय. पाटील विद्यापीठ
सचिव : डॉ. डी. वाय. पाटील विद्यापीठ सोसायटी
शैक्षणिक धोरणांची आखणी आणि संस्थात्मक प्रशासन हाताळण्याचा त्यांना दांडगा अनुभव आहे.
डॉ. स्मिता योगेश जाधव यांनी केवळ शिक्षणच नव्हे, तर माध्यम आणि उद्योग क्षेत्रातही आपले नेतृत्व सिद्ध केले आहे.
संचालक : पुढारी पब्लिकेशन
कार्यकारी संचालक : ‘टोमॅटो ९४.३ एफएम’ आणि ‘आपलं एफएम ९१.९’
माध्यम विश्वात धोरणात्मक निर्णय घेणे, प्रसारण व व्यवस्थापनाच्या जबाबदाऱ्या त्या यशस्वीपणे सांभाळत आहेत.
डॉ. स्मिता योगेश जाधव या 'कस्तुरी क्लब'च्या अध्यक्षा आहेत. या व्यासपीठाच्या माध्यमातून त्यांनी १८ हजारांहून अधिक महिलांचे एक सक्षम नेटवर्क उभे केले आहे. याद्वारे महिलांना सामाजिक सहभागाच्या संधी उपलब्ध करून देणे, नेतृत्व गुणांचा विकास करणे, महिलांमध्ये उद्योजकतेला चालना देऊन त्यांना आर्थिकदृष्ट्या स्वावलंबी बनवणे यासाठी त्या सातत्याने काम करत आहेत.
शिक्षण, प्रशासन आणि सामाजिक कार्याची दखल घेऊन त्यांना राष्ट्रीय व आंतरराष्ट्रीय स्तरावरील अनेक पुरस्कारांनी सन्मानित करण्यात आले आहे.
वेणूताई चव्हाण युवती पुरस्कार
भारत सन्मान निधी पुरस्कार
ग्लोबल वुमेन इन्स्पिरेशन अवॉर्ड
एज्युप्रिन्युअर ऑफ द इयर
बेस्ट सीईओ
आउटस्टँडिंग लीडरशिप इन हायर एज्युकेशन
प्राईड ऑफ इंडिया अवॉर्ड