पुणे: जावयाचा मारहाणीत मृत्यू झाल्यानंतर त्याचा दुचाकी अपघातात मृत्यू झाल्याचा बनाव रचणाऱ्या आजे सासरा आणि सासऱ्याला लोणीकंद पोलिसांनी अटक केली. सुलतान सादिक शेख (वय २४, रा. शिवनेरीनगर, कोंढवा) असे मृत्युमुखी पडलेल्या तरुणाचे नाव आहे. रहीम मोहम्मद शेख (वय ६५) आणि अमर रहीम शेख (वय ४५, दोघे रा. चौफुलावस्ती, कोलवडी, ता. हवेली) अशी अटक केलेल्या आरोपींची नावे आहेत. याप्रकरणी सुलतानचा भाऊ साबीर सादिक शेख (वय २६) यांनी लोणीकंद पोलिस ठाण्यात फिर्याद दिली आहे.
पोलिसांच्या माहितीनुसार, रिक्षाचालक असलेल्या सुलतानचा तीन वर्षांपूर्वी त्याचा विवाह झाला होता. काही कारणांवरून त्याचे पत्नीशी वाद झाले होते. त्यानंतर ९ नोव्हेंबर रोजी सासू आणि सासरे त्याच्या पत्नीला घेऊन माहेरी गेले होते. पत्नीचा शोध घेत सुलतान रात्री चौफुलावस्तीतील सासरी पोहोचला.
त्यावेळी आजेसासरे रहीम शेख आणि सासरे अमर शेख यांनी त्याला लाकडी दांडक्याने बेदम मारहाण केली. या मारहाणीत गंभीर जखमी झालेल्या सुलतानचा मृत्यू झाला. घटनेनंतर आरोपींनी सुलतानला रुग्णालयात नेले. तेथे वैद्यकीय तज्ज्ञांनी त्याला मृत घोषित केले. मात्र, सुलतानचा दुचाकीवरून पडून अपघात झाल्याने मृत्यू झाल्याचे आरोपींनी सांगितले. त्यामुळे सुरुवातीला अपघाती मृत्यूचा प्रकार असल्याचे भासवण्याचा प्रयत्न करण्यात आला.
दरम्यान, लोणीकंद पोलिसांनी घटनास्थळाची पाहणी केली असता, आरोपींच्या घरासमोर अपघात झाल्याच्या कोणत्याही खुणा आढळल्या नाहीत. घटनास्थळी दुचाकी पडलेली नव्हती किंवा अपघात झाल्याचे पुरावेही दिसून आले नाहीत. त्यामुळे पोलिसांचा संशय बळावला. सखोल चौकशी केली असता, दोन्ही आरोपींनी सुलतानला मारहाण केल्याची कबुली दिली.
त्याला मारहाण करण्यासाठी वापरलेले लाकडी दांडके पोलिसांनी जप्त केले आहे. तसेच दोन्ही आरोपींना अटक केली आहे. लोणीकंद पोलिस ठाण्याच्या वरिष्ठ पोलिस निरीक्षक सुनीता रोकडे यांनी या कारवाईची माहिती दिली. पोलिस निरीक्षक पवार पुढील तपास करत आहेत.