पुणे: वाचन संस्कृतीला चालना देणारा 'शांतता... पुणेकर वाचत आहेत' हा उपक्रम यंदा ३ डिसेंबर आयोजित करण्यात येणार आहे. पुणे पुस्तक महोत्सवाच्या निमित्ताने हा उपक्रम आयोजित केला आहे. या अंतर्गत सकाळी ११ ते १२ या वेळेत पुणे आणि पिंपरी- चिंचवडसह जिल्ह्यातील विविध ठिकाणी नागरिकाकडून वाचनाचा आनंद घेतला जाणार आहे. शाळा, महाविद्यालयांपासून शासकीय कार्यालयांपर्यंत आणि सोसायट्यांपासून मेट्रो स्थानकापर्यंत अनेक ठिकाणी या उपक्रमात नागरिकांचा सहभाग असणार आहे, अशी माहिती पुणे पुस्तक महोत्सवाचे मुख्य संयोजक राजेश पांडे यांनी प्रसिद्धिपत्रकाद्वारे दिली.
राष्ट्रीय पुस्तक न्यासातर्फे (एनबीटी) फर्ग्युसन महाविद्यालयाच्या मैदानावर १२ ते २० डिसेंबर या कालावधीत पुणे पुस्तक महोत्सव आयोजित केला आहे. महोत्सवाच्या पार्श्वभूमीवर 'शांतता... पुणेकर वाचत आहेत' हा उपक्रम आयोजित केला आहे. यंदा या उपक्रमाचे चौथे वर्ष आहे. या उपक्रमाला उच्च आणि तंत्रशिक्षण विभाग, जिल्हा प्रशासन, पुणे महापालिका, सावित्रीबाई फुले पुणे विद्यापीठ, समर्थ युवा फाउंडेशन यांचे विशेष सहकार्य मिळाले आहे.
पांडे म्हणाले, की गेल्या तीन वर्षांत या उपक्रमाला प्रतिसाद मिळाला आहे. केवळ पुणे, पिंपरी-चिंचवड आणि पुणे जिल्हाच नाही, तर राज्यभरात, देशभरात आणि परदेशातील नागरिक, वाचनप्रेमी या वाचन उत्सवात उत्साहाने सहभागी होतात. उपक्रमात नागरिक, वाचनप्रेमी सहभागी होऊ शकणार आहेत.
शाळा, महाविद्यालय, सार्वजनिक वाचनालय, ग्रंथालय, धार्मिक स्थळे, शासकीय कार्यालये, खासगी आस्थापना, शासकीय आणि खासगी विद्यापीठे, बसस्थानक, रेल्वेस्थानक, मेट्रो अशा सर्वच ठिकाणी सकाळी ११ ते १२ या वेळेत पुस्तक वाचनाचा उत्सव साजरा करण्यात येणार आहे.
या उपक्रमात आपल्या आवडीचे कोणतेही पुस्तक वाचता येणार आहे. वाचन करतानाचे छायाचित्र सोशल मीडियावर अपलोड करून सहभागाची नोंद करता येणार आहे. याबाबत अधिक माहिती फर्ग्युसन महाविद्यालयातील पुणे पुस्तक महोत्सवाच्या कार्यालयातून मिळेल, असे पांडे यांनी सांगितले.