पुणे: महापालिकेच्या नगरसचिव विभागातील एका महिला कर्मचाऱ्याशी गैरवर्तन केल्याचा गंभीर आरोप माजी उपमहापौरांवर करण्यात आला आहे. संबंधित महिलेने महापालिकेच्या विशाखा समितीकडे तक्रार दाखल केल्यानंतर हा प्रकार समोर आला असून, प्रशासनाने संबंधित माजी उपमहापौरांना पुढील आदेशापर्यंत महापालिका आवारात प्रवेश करण्यास बंदी घातली आहे.
महापालिकेच्या स्थायी समितीची बैठक गुरुवारी होती. बैठकीच्या वेळी नगरसचिव विभागातील कर्मचारी व अधिकारी कामकाजासाठी उपस्थित होते. जेवणाच्या सुटीत काही कर्मचारी बाहेर गेले असताना संबंधित महिला कर्मचारी कार्यालयात काम करत होती. त्याचवेळी महापालिकेत काही वर्षांपूर्वी उपमहापौरपद भूषविलेले एक माजी नगरसेवक कार्यालयात आले.
कार्यालयात आल्यानंतर संबंधित माजी उपमहापौरांनी महिला कर्मचाऱ्याचा हात पकडून त्यांच्याशी गैरवर्तन केल्याचा आरोप तक्रारीत करण्यात आला आहे. तसेच, त्यांच्याशी असभ्य भाषेत संवाद साधल्याचेही म्हटले आहे. महिलेने स्वतःची सुटका करून घेत हा प्रकार वरिष्ठ अधिकाऱ्यांच्या निदर्शनास आणून दिला. वरिष्ठांनी तिची बाजू ऐकून घेत धीर दिला.
या घटनेनंतर महापालिकेतील कर्मचारी वर्गातून संताप व्यक्त करण्यात येत असून, संबंधित महिलेने विशाखा समितीकडे धाव घेत तक्रार दाखल केली आहे. ''तक्रार प्राप्त झाली असून, त्यावर नियमानुसार योग्य ती कारवाई केली जाईल,'' अशी माहिती विशाखा समितीच्या अध्यक्षा तथा महापालिकेच्या विधी सल्लागार ॲड. निशा चव्हाण यांनी दिली.