राहू: ओढ्यात पडलेल्या मुलाला वाचविताना महिला व तिच्या मुलाचा मृत्यू झाला असल्याची धक्कादायक घटना देवकरवाडी (ता.दौड)येथील गणेशनगर शिवारात रविवारी (ता.२७) रोजी दुपारी एकच्या दरम्यान घडली. निर्मला अनिल दरेकर (वय ३०) हर्षद अनिल दरेकर (वय १० )असे संबंधित मायलेंकराचे नाव आहे.
याबाबतची सविस्तर माहिती अशी की, गणेशनगर येथील स्वत:च्या शेतामध्ये संबंधित महिला उसाच्या शेतामध्ये मिरचीचे रोपे लावली. त्यानंतर बांधावर आंब्याचे कोय लावत असताना शेजारीच खेळत असलेल्या लहान हर्षदनेही ओढ्याच्या कडेला झाड लावण्याचे अनुकरण करत होता. नकळत तो ओढ्याच्या पात्रात पडला.
यानंतर काही मिनिटांतच आईच्या लक्षात आल्यावर तीनेही आरडाओरडा करत शोधाशोध केली असता मुलगा ओढ्याच्या पाण्यात पडल्याचे लक्षात आले. निर्मला यांनीही ओढ्यात जात मुलाला वाचविण्याचा प्रयत्न केला. मात्र त्याही ओढ्यात वाहत गेल्या. निर्मला यांचा आरडाओरडाचा आवाज ऐकून काही वेळाने त्यांचे सासरे सोपान आले असता त्यांनी दोघांना पाण्यातून काढत राहु येथील खासगी रुग्णालयात दाखल केले. पुढील उपचारासाठी यवत येथील उपजिल्हा रुग्णालयात दाखल केले असता डॉक्टरांनी त्यांना मृत घोषित केले.
याबाबत यवत पोलीस ठाण्यामध्ये फिर्याद देण्याचे काम सुरू असून यवत पोलीस अधिकचा तपास करत आहेत. या परीसरातील ओढ्याचे खोलीकरण केल्यामुळे ओढ्यात पाणी जास्त होते. राहू येथे सकाळी चिमुकल्याचा मृत्यू त्यानंतर गणेश नगर परिसरामध्ये माय लेकरांचा मृत्यू यामुळे परिसरामध्ये शोकाकुल वातावरण होते.