पुणे: शारदीय नवरात्रौत्सवाच्या पार्श्वभूमीवर गुलटेकडी मार्केट यार्डातील फूलबाजार सुवासिक फुलांनी दरवळला आहे. देवीच्या पूजेसह केसांमध्ये माळण्यासाठी गजरे आणि वेण्यांना मागणी वाढल्याने जुई, चमेली, मोगरा अन्‌ कागड्याच्या फुलांना चांगलाच भाव मिळू लागला आहे. मागणीच्या तुलनेत आवक अपुरी पडत असल्याने दोन दिवसांत फुलांचा प्रतिकिलोचा दर सहाशे ते आठशे रुपयांनी वाढला आहे. जुईचा आणि मोगऱ्याचा किलोचा दर एक हजार ते बाराशे रुपयांवर, तर चमेलीचा दर बाराशे रुपयांवर पोहोचला आहे. तर, कागड्याच्या एक किलोच्या बंडलला ६०० ते ८०० रुपयांचा भाव मिळत आहे.
शहराच्या लगतला भाग असलेल्या सोरतापवाडी, म्हातोबाची आळंदी आणि कुंजीरवाडी परिसरातून जुई, तर तळेगाव ढमढेरे भागातून चमेलीची आवक होत आहे. याखेरीज, कर्नाटकातून मोगरा तसेच कागड्याच्या तयार गजऱ्याची बंडल बाजारात दाखल होतात. शनिवारी जुईची २०० ते ३०० किलो, चमेली अवघी सात ते आठ किलो आणि मोगरा आणि कागड्याच्या बंडलची सातशे ते आठशे किलोंची आवक झाली.
नवरात्रौत्सवाला आजपासून (दि. ११) प्रारंभ होत आहे. त्यामुळे शनिवारी फूलबाजारात गजरे तयार करणारे व्यावसायिक आणि किरकोळ विक्रेत्यांची खरेदीसाठी लगबग दिसून आल्याचे निरीक्षण अडते असोसिएशनचे अध्यक्ष अरुण वीर यांनी नोंदविले. बाजारात कागडा, जुई आणि चमेलीपासून तयार होणाऱ्या गजऱ्यांची प्रत्येकी २० ते ५० रुपयांना विक्री होत असल्याचे दिसून आले.
झेंडू, शेवंती, गुलछडीलाही आला भाव
मंदिरात करण्यात येणाऱ्या सजावटीसह देवीच्या पूजेसाठी बाजारात झेंडू, गुलछडी, शेवंती आणि ऑस्टरच्या मागणीत मोठी वाढ झाली आहे. बाजारात पुणे जिल्ह्यासह सोलापूर, सातारा, सांगली आणि बीड जिल्ह्यातून झेंडूची आवक होत आहे. सध्या घाऊक बाजारात दर्जानुसार झेंडूला प्रतिकिलो २० ते ५० रुपये, शेवंतीला १०० ते १६० रुपये, गुलछडीला २५० ते ४०० रुपये, तर ॲस्टरला ८० ते १२० रुपये दर मिळत आहे.
नवरात्रौत्सवामुळे गजरे आणि वेण्यांसाठी सुवासिक फुलांना, तर पूजेच्या अनुषंगाने झेंडू, शेवंती, गुलछडी आणि ॲस्टरला मागणी वाढली आहे. विशेषतः सुवासिक असलेल्या जुई, चमेली आणि कागड्याला चांगला उठाव आहे. मागणीच्या तुलनेत आवक मर्यादित असल्याने दोन दिवसांत दर वधारले आहेत. नवरात्रौत्सव तसेच दसऱ्यापूर्वीचे दोन दिवस फुलांना फुलांचे दर तेजीत राहण्याची शक्यता आहे.सागर भोसले, समन्वयक, अखिल पुणे फूलबाजार अडते असोसिएशन