पुणे; पुढारी वृत्तसेवा : विसर्जन मिरवणुकीत स्पीकरचा आवाज कमी करण्यास सांगितल्याने एकास दांडक्याने बेदम मारहाण करण्यात आल्याची घटना हडपसर भागात घडली. याप्रकरणी पोलिसांनी एकास अटक केली असून, साथीदारांविरुद्ध गुन्हा दाखल केला आहे.
हर्षल सुरेश घुले (वय 20, रा. मांजरी) असे अटक करण्यात आलेल्याचे नाव आहे. तर, त्याच्या दोन साथीदारांच्या विरुद्ध गुन्हा दाखल करण्यात आला आहे. याबाबत बाळासाहेब वसंत घुले (वय 50, रा. विठ्ठल मंदिराजवळ, मांजरी गावठाण) यांनी हडपसर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, मांजरी भागात विसर्जन मिरवणूक काढण्यात आली होती. स्पीकरचा आवाज मोठा असल्याने बाळासाहेब घुले आणि कुटुंबीयांनी आरोपींना आवाज कमी करण्यास सांगितले. त्यामुळे आरोपी हर्षल आणि त्याच्या साथीदारांनी घुले, त्यांची पत्नी आणि शेजार्यांना शिवीगाळ केली.
स्पीकरचा आवाज कमी न झाल्याने घुले यांनी पोलिस नियंत्रण कक्षात तक्रार दिली. त्यानंतर पोलिस घटनास्थळी आल्यानंतर त्यांनी कार्यकर्त्यांना समज दिली. काही वेळानंतर पोलिस तेथून निघून गेले. आरोपी हर्षल आणि त्याचे साथीदार तेथे आले. त्यांनी घुले यांना पुन्हा शिवीगाळ केली. त्यांना लाकडी दांडक्याने बेदम मारहाण केली. दांडके उगारून परिसरात दहशत माजविली. सहायक पोलिस निरीक्षक दाभाडे तपास करीत आहेत.
हेही वाचा